Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 23.07.2015 dan №14 nashr OTA KASBIGA SADOQAT

OTA KASBIGA SADOQAT

Rahmatli otamning «Bolam, kasbning katta kichigi bo‘lmaydi, asosiysi, ishga mehr qo‘yib, sidqidildan mehnat qilish kerak. Shunda inson kasb-koridan baraka topadi», degan so‘zlari doim qulog‘im ostida jaranglab turadi. Men bu o‘gitga umr bo‘yi amal qilib keldim va kam bo‘lmadim, - deydi NKMK 5-kon boshqarmasi 1-geotexnologik koni eritmalarni qayta ishlash uchastkasi payvandchisi, III- darajali «Konchilik shuhrati» ko‘krak nishoni sohibi Ummat Raziqov.

Navoiy viloyati Konimex tu¬ma¬nida tug‘ilib o‘sgan qah¬ra¬mo¬nimizning otasi Radjabboy ota bir umr temirchilik kasbi bilan shug‘ullangan. Biroq, olov bilan olishib og‘ir mehnat qilib, irodasi toblangan bo‘lishiga qaramay, u turmush o‘rtog‘ining bevaqt o‘limidan qattiq qayg‘uga tushdi. Otani og‘ir judolikdan faqat mehnat qutqardi. Qolgan umrini farzandlariga bag‘ishlab, tinimsiz ishladi, uch o‘g‘il va uch qizini hech kimdan kam qilmay, xalol, mehnatsevar, kamtar insonlar qilib voyaga etkazdi. Shu asnoda o‘g‘illarini ham temirchilik kasbiga qiziqtirishga harakat qildi.

Ummat Raziqov o‘rta maktabni tamomlagandan so‘ng Navoiy shahridagi 29-sonli qishloq xo‘jaligi texnikasi va sanoat bilim yurtida ta’lim olib, «Elektr-gaz payvandchisi» kasbiga ega bo‘ldi. Biroq, mustaqil ishlab pul topishga ulgurmay otasidan ham ayrilib qoldi. Yaxshiyamki, opa-akalari bor ekan, uni qanotiga olishdi. U 1983 yili Navoiy qurilish boshqarmasiga qarashli 2-qurilish montaj uchastkasiga payvandchi bo‘lib ishga kirdi. Ummat aka o‘n yildan ortiq Zafarobod qo‘rg‘onida amalga oshirilayotgan katta qurilish ishlarida qatnashdi, qo‘p qavatli uylarni isitish va suv ta’minoti quvurlarini o‘rnatish, ta’mirlash ishlariga o‘z hissasini qo‘shdi. 1994 yili qurilish uchastkasi tugatilganligi sababli, 5-kon boshqarmasining 1-geotexnologik koniga payvandchi vazifasiga ishga o‘tdi.

- Ish faoliyatimning dastlabki kunlaridan birida menga kadrlar bo‘limi joylashgan boshqarma binosiga temir eshik yasash vazifasi yuklatildi, - deydi Ummat aka. - Bu ishga bor mas’uliyat bilan yondashishga harakat qildim. Ish yakunida kadrlar bo‘limi boshlig‘i Irina Sedova mehnatim natijasini ko‘rib, mening nomimga ko‘p maqtovlar bildirdi, hamda rahbariyatga 3-malakaviy toifamni birdaniga 5-toifaga ko‘tarish haqida taklif berdi. Hozirda bu voqeani xursand bo‘lib eslayman. O‘sha paytlar qaniydi, bu kunlarimni otam ko‘rsa, onam ko‘rsa, deya armon qilib yurdim. Chunki farzand yutug‘i uchun chin yurakdan quvonadigan bu-ota, bu-ona.

Yillar o‘tgan sayin Ummat aka o‘z kasbining yanada mohir ustasiga aylandi. Berilgan topshiriqlarga mas’uliyat bilan yondashib, har bir ishni puxta bajarishga odatlangan qahramonimiz mehnat jamoasida katta hurmat topdi. U yaxshi payvandchi bo‘lish uchun insonning fantaziyasi boy, dunyoqarashi keng, bir so‘z bilan aytganda, haqiqiy ijodkor bo‘lishi zarur, deb o‘ylaydi. 1-geotexnologik koni eritmalarni qayta ishlash uchastkasi boshlig‘i Sohib Jalolov ham Ummat aka haqida iliq fikr¬lar bildirdi: - Jamoadoshlar orasida «zargarlik ishlari ustasi», deb nom olgan Ummat aka o‘zining tabiatdan bosiqligi, kamtarligi bilan hurmatga loyiq ishchilarimizdan. Har qanday top¬shiriqni bajarishga jiddiy kirishadi. Ko‘p yillik tajribaga ega bo‘lganligi sabab ventilyasiya va suv ta’minoti sxemalarini juda yaxshi tushunadi, nosozliklarni tez aniqlab beradi. Ummat akaning yana bir ajoyib insoniylik fazilati bu - yosh ishchi-xodimlarga alohida e’tiboridir. Jamoamizga qo‘shilgan har bir ishchiga otalarcha mehr berib, o‘z kasbini sevishni, berilgan vazifalarga mas’uliyat va intizomlik bilan yondashishni o‘rgatadi, ulardan o‘zining boy bilim va tajribalarini ayamaydi. SHogirdlari payvandchi Sobir Negmurotov, tokar Nuraddin SHinjirbaev, chilangar ta’mirlovchilar Nizomiddin Azimov, Vays va Vayson Jubanovlar Ummat akadan kasb sirlarini o‘rganishmoqda. YAna Ummat aka zo‘r oshpaz, bo‘linmamizda o‘tkaziladigan katta-kichik tadbirlarda hammamizni mazali palovi bilan siylaydilar».

Donishmandlardan biri «Faqat amalga oshirgan ishlaringizgina qadringizni belgilaydi», deganda mutlaqo haq edi. Ummat aka faqat va faqat mehnati bilan qadr topdi. Tajribali payvandchi ishdan bo‘sh vaqtlarida qarindosh-urug‘lari va qo‘shnilarining maishiy texnikalarini sozlash bilan band bo‘ladi. Ummat Raziqov baxtli oila boshlig‘i, rafiqasi Robiya opa bilan ikki qiz va bir o‘g‘ilni tarbiyalab voyaga etkazishdi. Katta qizlari Qizjibek 4-geotexnologik konda xamshira bo‘lsa, Oliya Konimex iqtisod kolledjida laborant bo‘lib ishlamoqda. Ulug‘bek esa 1-geotexnologik konda operator vazifasida mehnat qiladi. Shirindan - shakar nevaralari Zarina, Zaynab va Imronbeklarning sevimli bobo-buvilariga aylangan Ummat aka va Robiya opaning turmush qo‘rganlariga yaqinda 30 yil to‘ldi. Shu kunlarda ular Ulug‘bekni uylantirib, elga to‘y berish tashvishida yuribdilar. Mulohazali va kamtar qahramonimiz suhbatimiz yakunida shunday fikrlarni bildirdi:

- Otam kasbini egallaganimdan, kamtarona mehnatlarim o‘z qadrini topganidan, qolaversa, aka-opalarim, farzandlarim hayotda o‘z o‘rinlarini egallaganliklaridan xursandman. Endigina mehnat faoliyatini boshlayotgan yoshlarga hayotda halol mehnatdan ortiqroq ulug‘vor ishning o‘zi yo‘q, degim keladi.

Nafisa SAGATBAEVA.
Baxtiyor MURODOV olgan surat.
Suratda Ummat Raziqov.

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 23.07.2015 dan №14 nashr OTA KASBIGA SADOQAT