Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №17 от 14.09.2018 NAVOIY KON-METALLURGIYA KOMBINATI: XODIMLAR MANFAATLARI E’TIBOR MARKAZIDA

NAVOIY KON-METALLURGIYA KOMBINATI: XODIMLAR MANFAATLARI E’TIBOR MARKAZIDA

2017-2021 yillarda O‘zbekiston Respublikasini rivojlantirishning beshta ustuvor yo‘nalishlari bo‘yicha Harakatlar strategiyasiga asosan kasaba uyushmalari tomonidan munosib ish haqi, me’yorlarga muvofiq ish sharoitlarini yaratish, ishlab chiqarish jarayonini xavfsiz tashkil etish, pensiya ta’minoti kabi ijtimoiy masalalar va ishchi-xodimlar muammolari yechimiga qaratilgan tizimli ishlar olib borilmoqda.

Navoiy kon-metallurgiya kombinati kasaba uyushmasi kengashining o‘ziga xos jihati shundaki, u 6 ta kasaba uyushmalari qo‘mitalari birlashmalari va kombinat tarkibiga kiruvchi bo‘linmalarning 21 ta kasaba uyushmalari qo‘mitalaridan iborat yirik tashkiliy tuzilma sanaladi. A’zolar soni esa 73 ming nafar. Har bir ishchi kasaba uyushmalari a’zosi bo‘lishdan manfaatdor. Chunki bu orqali u jamoa shartnomasida ko‘zda tutilgan barcha ijtimoiy-iqtisodiy me’yorlar va imtiyozlardan foydalanish huquqini qo‘lga kiritadi.

Kombinatda yaratilgan mehnat sharoitlari, ishlab chiqarishdagi jarohatlar va kasb kasalliklari ehtimoli tizimli ravishda tahlil qilinishi barobarida, mehnat muhofazasi va zarur sharoit yaratishga qaratilgan optimallashtirish choralarining samaradorligi muntazam ravishda baholanib boriladi. Konchilar kasaba uyushmalari ishchilari mehnat muhofazasi va texnik xavfsizlik bo‘limi xodimlari bilan birga sodir bo‘lgan turli baxtsiz hodisalarni o‘rganishda faol ishtirok etishadi. Bo‘linmalardagi sharoitlarni yaxshilashga qaratilgan rejalarni ishlab chiqishga xizmat qiluvchi – ish o‘rinlari va ish sharoitlari mutanosibligi attestatsiyasida qatnashadi. Kasaba uyushmasi tomonidan ishchilar va kombinat pensionerlarining murojaatlarini ko‘rib chiqish xodimlar manfaatini himoya qilishning yana bir shakli hisoblanadi. Ularning aksariyati odatda ijobiy yechim topadi.

Kasaba uyushmalari kengashi faoliyatining yana bir yo‘nalishi ishchilarni sog‘lomlashtirish sanaladi. Kombinatning Tibbiyot-sanitariya bo‘limi beshta yirik muassasani birlashtiradi. Bular Navoiy, Uchquduq, Zarafshon, Nurobod shaharlari va Zafarobod shahar tipidagi aholi punktida joylashgan bo‘lib, 200 mingga yaqin aholiga xizmat ko‘rsatadi. Barcha muassasalarga zamonaviy tibbiy va diagnostika jihozlari o‘rnatilgan. 2016 yilda 3-Tibbiy-sanitariya bo‘limi negizida «Ona va bola skrining markazi» ochildi. Barcha bo‘linmalar shifokorlarining muntazam malaka oshirib borishiga alohida e’tibor qaratilgan.

Navoiy shahrida mehnatkashlarning sog‘lomlashtirilishi uchun «Metallurg» sanatoriy-profilaktoriysi, Uchquduqda esa joriy yilda to‘liq ta’mirdan chiqishi mo‘ljallanayotgan «Konchi» profilaktoriysi faoliyat yuritadi. Nurobod shahrida «Nurobod» balneologik sanatoriysi ham bor. Joriy yilda Jizzax viloyatining Zomin tumanida 150 o‘ringa mo‘ljallangan yana bir sanatoriy foydalanishga topshirilmoqda. Chimyon tog‘li hududida «Zarafshon» pansionati yil bo‘yi faoliyat ko‘rsatadi. Mavsumiy dam olish uchun esa «To‘dako‘l» oromgohi mo‘ljallangan. Bundan tashqari, kasaba uyushmalari tomonidan yurtimiz va Yalta, Kislovodskdagi mashhur sanatoriylarga yo‘llanmalar berib boriladi.

Navoiy kon-metallurgiya kombinatida mehnatkashlar va ularning oilalarining sport bilan shug‘ullanishi va madaniy-ma’rifiy hordiq chiqarishi uchun yetarlicha sharoit yaratilgan. Shu maqsadda NKMK balansida 9 ta madaniyat muassasasi mavjud. Bu muassasalarda 170 dan ortiq badiiy jamoalar va to‘garaklar tashkil etilgan bo‘lib, ulardan 26 tasi «Xalqona» va «Namunali» deb tan olingan.

Ularda  4 500 nafarga yaqin bolalar va kattalar shug‘ullanadi. Badiiy jamoa bir necha marotaba respublika va xalqaro tanlovlar g‘oliblari safidan o‘rin olishgan. Ular turli mamlakatlarda o‘tkazilgan festival va ko‘rgazmalarning doimiy ishtirokchisi ham sanaladi.

Navoiy, Uchquduq, Zarafshon, Nurobod shaharlarida 340 mingdan ko‘p kitob fondiga ega kutubxonalar mavjud. 2013 yildan buyon Navoiy shahridagi «Farhod» madaniyat saroyida NKMK muzeyi faoliyat olib boradi. Uning zallarida betakror Qizilqum yerlari tarixi, mashhur sahroning boy tabiatini aks ettiruvchi mingga yaqin eksponat va tarixiy daliliy ashyolar mavjud.

O‘zbekiston kasaba uyushmalari Federatsiyasi Kengashi tomonidan o‘tkaziladigan tanlovlarda kombinat tarkibiga kiruvchi bolalar sog‘lomlashtirish oromgohlari har yili eng yaxshilar safidan o‘rin oladi. «Sarmish», «Bolajon», «So‘g‘diyona», «Zarafshon» oromgohlari shular jumlasidandir. Mustaqillik yillarida yana bir oromgoh – «Pahlavon» sport-sog‘lomlashtirish oromgohi «Chorvoq» suv ombori qirg‘og‘ida qad rostladi. 2017 yilda NKMK balansiga Samarqandning Urgut tumanida joylashgan «Kelajak» bolalar sog‘lomlashtirish oromgohi o‘tkazildi. Muassasa to‘liq rekonstruksiya qilingach, joriy yilda kombinat xodimlarining 900 nafardan ortiq bolalari bu so‘lim go‘shada dam olish imkoniga ega bo‘ldi. Bundan tashqari, Zarafshon va Navoiyda bolalarning kunduzgi tashrifini nazarda tutuvchi 5 ta shahar oromgohlari, shu jumladan, ikkita 15-17 yoshdagi o‘smirlarni qabul qilishga mo‘ljallangan mehnat va dam olish oromgohlari faoliyat yuritmoqda. Har yili yoz oylarida NKMK bolalar sog‘lomlashtirish oromgohlarida 10 ming nafardan ortiq bola maroqli dam oladi. Ular safida «Mehribonlik» va «Shodlik» bolalar uylari tarbiyalanuvchilari, shuningdek, Tomdi, Nurota, Konimex, Zarafshon va Uchquduqning chekka hududlarida istiqomat qiluvchi kam ta’minlangan oilalarning farzandlari ham bor.

30 ming nafarga yaqin xodim va ularning oilalari kombinatdagi sport mashg‘ulotlari ishtirokchilari sanaladi. Jismoniy tarbiya, sog‘lomlashtirish va ommaviy sport mashg‘ulotlari 8 ta sport majmuasida o‘tkaziladi, ularda 96 ta jismoniy tarbiya jamoalari sport bilan shug‘ullanadi. 

Keyingi yillarda Zarkent, Zafarobod, Marjonbuloq qo‘rg‘onlari, Zarafshon, Uchquduq shaharlarida yangi sport majmualari, mashg‘ulot zallari, klub¬lar va madaniyat uylari barpo etildi. Jismoniy tarbiya va sport komplekslari sirasiga esa Navoiydagi «So‘g‘diyona», Zarafshondagi «Alpomish» va Uchquduqdagi «Lochin» sport sog‘lomlashtirish majmuasi kiradi. Nurobod va Zafarobodda filiallariga ega bo‘lgan bolalar va o‘smirlar sport maktablarini alohida qayd etish lozim. Ularda 2 800 nafardan ortiq bola sport bilan shug‘ullanadi. Kattalar sport va sog‘lomlashtirish guruhlariga esa 6 000 nafardan ko‘proq kishi jalb qilingan. 

Munosib mehnat sharoitlari yaratilgan, bo‘sh vaqt to‘g‘ri tashkil etilgan va ijtimoiy xavfsizligi to‘liq ta’minlangan jamoa yangidan-yangi zafarlarga erishishni niyat qilgan holda hamjihatlik namunalarini ko‘rsatib faoliyat ko‘rsatmoqda. Zero, bugunidan rozi odamlarning ertangi kunga bo‘lgan ishonchi ham yuksak bo‘ladi.

Isroil RAHMATOV,

Navoiy kon-metallurgiya kombinati 

kasaba uyushmalari Kengashi raisi.

 

“ISHONCH” gazetasi 

2018 yil sentyabr oyining 

maxsus sonidan olindi. 

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №17 от 14.09.2018 NAVOIY KON-METALLURGIYA KOMBINATI: XODIMLAR MANFAATLARI E’TIBOR MARKAZIDA