Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №6 от 16.03.2017 Kelajagi porloq kon

Kelajagi porloq kon

Mamlakatimiz iqtisodiyotida yetakchi o‘rin tutgan yirik sanoat korxonalarida amalga oshirilayotgan islohotlar, modernizatsiya jarayonlari ishlab chiqarish quvvatini yanada oshirish, zamonaviy texnologiyalardan samarali foydalanishga imkon yaratadi.
Navoiy kon-metallurgiya kombinatiga qarashli Markaziy kon boshqarmasida innovatsion texnologiyalarning ishlab chiqarishga jalb etilishi ish unumdorligini yangi sifat bosqichiga olib chiqmoqda. Kon boshqarmasiga qarashli «Oltinni uyumda ishqorlash sexi» konida o‘z ishining ustasi bo‘lgan ishchi-xizmatchilar, malakali mutaxassislar mehnat qilishadi. Korxonada tarkibida oltin miqdori kam bo‘lgan rudalarni qayta ishlab, uyumda ishqorlash orqali oltin ishlab chiqariladi. Bunday texnologiya nafaqat mamlakatimiz, balki MDH davlatlarida ham yuqori iqtisodiy samaradorligi, noyobligi bilan ajralib turadi.
– Bu tengsiz loyiha ishga tushirilgan paytda konimiz Evroosiyo hududidagi eng yirik uyumda ishqorlash korxonasi hisoblangan bo‘lsa, bugungi kunga kelib u dunyodagi eng yirik sanoat majmuasiga aylandi, - deydi kon bosh texnologi Rustam Egamov.
Yosh va g‘ayratli mahalliy mutaxassislarning bilim va tajribalari oshirilayotganligini ishlab chiqarishga yangicha yondashuv talab etadigan ushbu texnologiyalarni o‘zlashtirayotganliklarida ham ko‘rish mumkin.
– Men Navoiy davlat konchilik institutini tugatib, ushbu korxonaga ishga qabul qilindim, - deydi kon muhandisi O‘tkir Mamatov. – Hozirda noyob texnologiya sirlarini mukammal o‘rganishga harakat qilayapman. Ishga ijodiy yondashuvimiz yaxshi samara bermoqda.
Konda o‘tgan yillarda qator modernizatsiya tadbirlari amaliyotga samarali tatbiq etilishi evaziga ishlab chiqarishda yuqori natijalar qo‘lga kiritildi. Tog‘ jinslarini maydalash-saralash hamda konveyer usulida tashish majmuasida xorijiy kompaniyalarning texnikalaridan unumli foydalanilmoqda. E’tiborli jihati, ishlab chiqarishda qo‘llaniladigan dastgohlarni modernizatsiyalash, mahalliylashtirish dasturini ro‘yobga chiqarish, texnologik jarayonga yangi ishlanmalarni tadbiq etish ishlari izchillik bilan davom ettirildi. Navoiy kon-metallurgiya kombinati bosh direktori Quvondiq Sanaqulov rahbarligida ishga tushirilgan yangi texnologiya – to‘yingan oltin tarkibli eritmalarni faol ko‘mirga sorbsiyalash qurilmasi oltin ishlab chiqarish miqdorini ko‘paytirishga imkon yaratdi. Bunday innovatsion yondashuvlar natijasida konda 2016 yilda davlat buyurtmasi 100.1 foizga uddalandi. Joriy yil ikki oylik ko‘rsatkichi 105 foizdan oshdi.
Avval valyutaga chetdan keltirilgan ko‘pgina ehtiyot qismlarni mahalliylashtirish dasturi doirasida respublikamiz korxonalarida tayyorlash yo‘lga qo‘yildi. Aytaylik, tog‘-kon sanoatida maydalash, saralash, ishqorlab eritish ishlarida qo‘llaniladigan ehtiyot qismlar va mahsulotlar «Navoiy mashinasozlik zavodi» ishlab chiqarish birlashmasida, ayrimlari Toshkentdagi «GAUCH» mas’uliyati cheklangan jamiyati, «Maxsus polimer zavodi» qo‘shma korxonalarida tayyorlanmoqda. Pirovardida XXI asr boshida ehtiyot qismlarning 90 foizi xorijdan keltirilgan bo‘lsa, bugungi kunga kelib korxona ehtiyoji uchun zarur ehtiyot qismlarning 90 foizi mahalliylashtirildi.
Rudani qayta ishlash, uyum hosil qilish, uni ishqorlash, eritmalarni qayta ishlab, tayyor mahsulot holatiga keltirish kabi texnologik jarayonlarni bajarish uchun kishida matonat va tajriba bo‘lishi zarur. Bir-biriga zanjir singari bog‘langan jarayonni boshqarishda kon boshlig‘i Hamid Kenjaev, bosh muhandis Farrux Soyibov, bosh mexanik Xurshid Negov, texnik ishlab chiqarish byurosi boshlig‘i Valeriy Borisov, uchastka boshlig‘i Baxtiyor Fayziev, muhandis – konstruktor Bahodir Qurbonov kabi malakali mutaxassislarning xizmati beqiyos. Shuningdek, Chingiz Guseynov, Jahongir Islomov, San’at Karomatov, Nurali Ro‘ziev, AkbarUmarov, To‘lqin To‘ymurodov, Aziz Ergashev, Akbar Muhammadiev, Feruz Nasullaev, Yusuf Shernazarov kabi muhandis-texnik xodimlar va ishchilar tashabbuskorligi bilan boshqalarga ibrat bo‘lishayapti.
Korxona mutaxassislarining mavjud imkoniyatlardan kengroq foydalanib, nodir metallardan tashqari mis, nikel kabi rangli metallarni ajratib olish bo‘yicha olib borayotgan izlanishlari korxona laboratoriyasi sharoitida sinovdan o‘tmoqda. Ishlab chiqariladigan mahsulot miqdorini oshirish maqsadida korxona hududida yaqin kelajakda yangi zavod ishga tushirish uchun loyihalash instituti tomonidan amaliy ishlar olib borilmoqda.
Konda xodimlarning malakasini oshirish, ishlab chiqarish amaliyotlarini sifatli o‘tkazish ishlariga jiddiy e’tibor qaratilgan. Tajribali muhandis Baxtiyor To‘laev, Alisher Berdievlar yosh mutaxassislarga ustozlik qilib, o‘z bilim va ko‘nikmalarini o‘rgatishayapti. Korxona muhandis-texnologlarining 95 foizi Toshkent davlat texnika universiteti va Navoiy davlat konchilik instituti bitiruvchilari hisoblanadi. Kon ishchi-xodimlari turli ommaviy tadbirlar, sport musobaqalarida ham faol ishtirok etib, futbol, aql charxi hisoblangan shaxmat bo‘yicha o‘tkazilayotgan bellashuvlarda doimo sovrinli o‘rinlarni qo‘lga kiritib kelayapti.
Jamoa 2017 yilda ham barcha davlat buyurtmalarini o‘z vaqtida bajarib, mamlakatimiz iqtisodiy rivojiga munosib hissa qo‘shadi.

Azamat ZARIPOV.

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №6 от 16.03.2017 Kelajagi porloq kon