Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 19.03.2015 dan №6 nashr Mehnatidan qadr topgan Petrovlar

Mehnatidan qadr topgan Petrovlar

Bir so'zli, talabchan va hech ham charchamaydigan... bu ta'rifu tavsiflar hoynahoy iqtidorli, tirishqoq yoshlarimizdan biri haqida bo'lsa kerak, deb o'ylashingiz tabiiy. Biroq, so'z etmish yoshini qarshilayotgan, harakatlari chaqqon, oliy toifali murabbiy, xalqaro toifadagi hakam, suzish bo'yicha O'zbekiston Respublikasi sport ustasi, O'zbekistonda xizmat ko'rsatgan xalq ta'limi xodimi, so'nggi 4 ta olimpiada ishtirokchisi Daniya Falyaxovna Galandinova haqida bormoqda.

- Oltmish yildan buyon suzish bilan shug'ullanganimdan bo'lsa kerak, o'zimni engil va baquvvat his qilaman. SHu kungacha biror marta og'ir betob bo'lganimni eslay olmayman. SHubhasiz, sport meni tarbiyaladi, kamolotga etkazdi, hayotim mazmuniga aylandi. Turmush o'rtog'im Viktor Vladimirovich Petrov ham suzish bo'yicha malakali sport ustasi, - deya suhbatni boshladi qahramonimiz.

Viktor Vladimirovich 78 yoshda. Otaxon salkam 70 yil suzish bilan shug'ullanganlar. Hassaga suyanib, sekin-asta qadam tashlayotgan bu inson bilan so'zlashsangiz bormi, ko'zlari chaqnab, iloji bo'lsa, shu ahvolda ham zo'r sportchi, yaxshi murabbiy ekanliklarini isbotlashga chog'lanib qoladilar. Odatda sportchilar kamgap, tortinchoq bo'lishadi. Lekin eru xotin Petrovlar bilan suhbatimiz juda tez qo'r oldi. Yоsh Viktor suzishga bo'lgan mehri tufayli har kuni hech bo'lmaganda ikki-uch marta uylari yonidagi ko'lda suzishni mashq qilar edi. Mehnat faoliyatini Qarshidagi 5-o'rta ta'lim maktabida jismoniy tarbiya o'qituvchisi sifatida boshlaganda Viktor Vladimirovich 22 yoshda edi. Ilk damlardanoq bolalar qalbida sportga bo'lgan muhabbatni shakllantirish uchun ota-onalar bilan suhbatlashib, ularga farzandlarini sportga jalb qilish kerakligini tushuntirar edi.

- Shunday paytlar ham bo'lganki, men yosh sportchilarni ko'chama-ko'cha yurib qidirganman. Har bir bolaga murabbiy ko'zi bilan qarab, kim qanday qobiliyatga ega ekanligini darhol payqab olganman. O'zbekistonda ham suzish bo'yicha chempionlar etishib chiqishini chin dildan xohlaganim uchun ham shunday qilganman, - deydi V.Petrov. U keyinchalik Qarshi davlat pedagogika institutining jismoniy tarbiya ta'limi, O'zbekiston davlat jismoniy tarbiya institutining suzish kafedrasida o'qituvchi bo'lib ishladi. «Dinamo» sport komandasida yoshlarga murabbiylik qildi. O'qituvchi sifatida Respublika Oliy sport mahorati maktabida o'quvchilarga saboq berdi. Shu kunga qadar juda ko'plab iqtidorli yoshlarga ustozlik qilgan V.Petrov O'zbekistonda suzish sportining rivojlanishiga katta hissa qo'shdi. Suhbat chog'ida Viktor Vladimirovichning «Agar Daniyadek turmush o'rtog'im bo'lmaganida sport­ni allaqachon tark etardim. SHu inson mening ilhomim, og'ir kunlarimda suyanchig'im bo'lgan», - degan fikrlari e'tiborimni tortdi.

Daniya opa bolalik onlarini xotirlar ekan, Ikkinchi jahon urushining olovli kunlari uning xonadonini ham chetlab o'tmagani, og'ir damlarda ochiq ko'ngil va mehmondo'st o'zbek xalqi ularni mehr bilan qarshi olgani, serquyosh shu zaminda unib-o'sib, qadr, e'zoz topganini faxrlanib gapirdi.

Ish faoliyatini poytaxtdagi «Spartak» jamiyatiga qarashli Bolalar va o'smirlar sport maktabida murabbiylikdan boshlagan Daniya opa keyinchalik sportchi-pedagog sifatida Respublika Oliy sport mahorati maktabida o'quvchilarga ustozlik qildi. Sport ikki dilni bir-biriga umrbod bog'ladi. Baxtli oila farzandlari ham sportga mehr qo'ydilar, o'zbek xalqining betakror urf-odat va an'analari ruhida kamolga etdilar.

Bundan yigirma ikki yil muqaddam Navoiy kon-metallurgiya kombinati rahbariyati Petrovlar oilasini «So'g'diyona» jismoniy tarbiya va sport klubiga qarashli «Oltin suv» suzish markaziga bosh murabbiylikka ishga taklif qildi.

- Dastlab ko'p o'yladik. Chunki poytaxtda etishib chiqayotgan yosh iqtidorli shogirdlarimiz bor hamda yaxshi sport bazasi mavjud edi. Mamlakat miqyosida o'tkazilgan musobaqalarda Navoiy shahrida suzishga qiziquvchi yoshlarni uchratgan edik. Shu boisdan hech ikkilanmay bu ko'rkam shaharga keldik. Olimpiya o'yinlari yoki xalqaro musobaqalarda shogirdlarimning muvaffaqiyatli ishtirokini ko'rib, qalbim jo'shib ketadi. Bu tuyg'uning ta'rifini so'z bilan tushuntirish ancha mushkul. Shuni faxr bilan ayta olamanki, ular mening shogirdlarim, ular navoiylik yoshlar, - deydi Daniya opa. Darvoqe, bir haqiqat juda aniq. «Oltin suv» suzish markazining tamal toshini qo'ygan Petrovlar dunyoga mashhur suzuvchilarni kashf etdilar, tarbiyaladilar. Ular shogirdlarini hamisha sportning mashaqqatli sinovlarini mardonavor engib o'tishga o'rgatdilar. Shundanmi, «Oltin suv» markazi sportchilari O'rta Osiyoning eng kuchli jamoalari safidan o'rin olib kelmoqda. Murabbiylarning talabchanligi va mahorati tufayli suzish markazida o'nga yaqin xalqaro toifadagi sport ustalari, 50 nafardan ziyod sport ustalari, ko'plab Osiyo va jahon chempionati ishtirokchilari, xalqaro musobaqalar g'olib va sovrindorlari etishib chiqdi.

- Ilk bor suzish markaziga kelganimda yosh bolakay edim. Shunda ustozim Viktor Vladimirovich «Bo'lajak chempion keldi» deb, meni quchganlarida «Nahotki men chempion bo'laman?» deya o'ylanib qolganman. Mana shu ikki og'iz so'z menga qanchalik kuch bag'ishlaganini tasavvur ham qila olmaysiz. Bugun erishgan yutuqlarimda ustozimizning saboq va xizmatlari mujassamdir, - deydi suhbatda O'zbekiston terma jamoasi a'zosi, xalqaro toifadagi sport ustasi Ibrohim Nazarov.

Viloyat sportchilari milliy terma jamoa safida 1996 yilda AQSH (Atlanta), 2000 yilda Avstraliya (Sidney), 2004 yilda Gretsiya (Afina), 2008 yilda Xitoy (Pekin) olimpiadalarida munosib ishtirok etganliklari murabbiy Daniya Galandinova mehnati va mahoratining natijasidir.

- Yurtboshimizning 2015 yilni «Keksalarni e'zozlash yili» deb e'lon qilishlari biz, keksa sportchilarning ham ruhiga - ruh, g'ayratiga - g'ayrat qo'shdi. Bunga munosib javob qaytarmog'imiz lozim. Ona yurtim O'zbekistonning chempionlar mamlakati bo'lishi yo'lida qo'limdan kelgancha harakat qilaman, - deydi Daniya opa.

- Hozir avvalgidek baquvvat, serharakat sportchi bo'lmasamda, bundan xafa emasman. Chunki qarilikning ham o'z gashti bor. Bilasizmi, mehnat qilsa, qadr topadigan davr keldi. Men shu yurtga xizmat qilganimdan faxrlanaman, - deya qo'shimcha qildi Viktor Vladimirovich.

Mulohazalarini shukronalik, yaxshi kayfiyat va ko'ngil xotirjamligi bilan ifodalagan Petrovlar bilan suhbatlasharkanman, qalbimda ularning tajribasi va bilimidan hali qator shogirdlar bahramand bo'lishi, «Oltin suv» suzish markazidan yurtimiz dovrug'ini dunyoga taratadigan ko'plab sportchilar etishib chiqishiga o'zgacha ishonch tug'ildi.

 

Nafisa VAXIDOVA.

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 19.03.2015 dan №6 nashr Mehnatidan qadr topgan Petrovlar