Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №7 от 12.04.2018 UCHQUDUQNING «LOCHIN»I

UCHQUDUQNING «LOCHIN»I

Yosh avlodning jismonan sog‘lom, ruhan tetik insonlar bo‘lib voyaga etishida bolalar sport majmualari, suv havzalari, sport zallari va maydonlarining o‘rni beqiyosdir. Bu borada Navoiy kon-metallurgiya kombinatining shahar va qo‘rg‘onlarida bunyod etilgan bir-biridan sifatli va zamonaviy sport inshootlari ko‘plab chempionlarni tarbiya qilishda bosh omil bo‘lmoqda. Ushbu ezgu maqsad yo‘lida kombinat tarkibida 5 ta stadion, 5 ta suv havzasi, 80 dan ortiq sport zallari va maydonchalari samarali faoliyat yuritmoqda.

Kombinatning beshigi hisoblangan Uchquduqda keng bunyodkorlik, o‘zga­rishlar ro‘y berayotganiga barchamiz guvohmiz. Shahardagi “Lochin” sport majmuasida bugungi kunda sportning badiiy gimnastika, boks, dzyudo, milliy kurash, suv sporti kabi o‘nlab to‘garaklarda faoliyat yuritayotgan tajribali ustozlar qo‘lida har yili o‘nlab sportchilar nufuzli tadbirlarda faol ishtirok etib kelmoqda. Ular orasida sportning dzyudo, milliy kurash va sambo turlari bo‘yicha oliy toifali murabbiy Alisher Shodmonovning yutuqlari, uning shogirdlari qo‘lga kiritayotgan natijalarini alohida e’tirof etish mumkin. Quvonarlisi, uning shogirdi Mahliyo Mannonova yaqinda Zulfiya nomidagi davlat mukofotiga sazovor bo‘ldi. Bu bilan Alisher akaning uch nafar polvon qizi Zulfiyaxonim izdoshlari safidan o‘rin oldi.

Shimoliy kon boshqarmasiga qarashli “Lochin” sport majmuasida tarbiyalanayotgan yosh sportchilarning yutug‘i yildan-yilga oshib bormoqda.

— Uchquduqlik bolalarning maktabdan keyingi eng sevimli maskani bizning sport majmuamiz desam, aslo xato qilmagan bo‘laman, - deydi “Lochin” sport majmuasi direktori Gulnora Mosabutdinova. – Bu erda dzyudo bo‘yicha mamlakat ayollar terma jamoasida o‘z o‘rniga ega sportchilar etishib chiqayapti. Joriy yilning fevral oyida Toshkent shahrida sambo bo‘yicha erkak va ayollar, yoshlar va o‘smirlar o‘rtasida o‘tkazilgan O‘zbekiston chempionatida Alisher Shodmonovning tarbiyalanuvchilari respublika bo‘yicha eng yuqori natijalarni qo‘lga kiritib, 4 ta oltin va 5 ta bronza medallarga sazovor bo‘lishdi va Mongoliyaning Ulan-Bator shahrida bo‘lib o‘tadigan Osiyo chempionatiga yo‘llanma olishdi. Joriy yilning may oyida o‘tkazilishi kutilayotgan ushbu nufuzli musobaqaga bugun Uchquduqda qizg‘in tayyorgarlik ketmoqda.

Albatta, Qizilqum sahrosida yashashning o‘zi bir jasorat bo‘lsa, sog‘lom va barkamol Zulfiyaxonim izdoshlarini tarbiya qilishlik ikki karra qahramonlik. Jonkuyar ustoz Alisher Shodmonov sakkiz yildan buyon yosh yigit-qizlarga sportning dzyudo, milliy kurash va sambo turlaridan saboq berib kelayapti.

– Shogirdlarimning jahon, Osiyo chempionatlari, xalqaro musobaqalardagi har bir ishtirokini katta hayajon bilan kuzataman, - deydi A.Shodmonov. – Har bir g‘alaba ortidagi mehnat samarasini ko‘rish esa kishiga shavqu zavq baxsh etish barobarida yangi marralar sari ruhlantiradi.

Uning tarbiyasida uch nafar dzyudochi qiz – Iroda Jumanova 2015 yilda, Dilnoza Kamolova 2017 yilda va nihoyat Mahliyo Mannonova 2018 yilda Zulfiya nomidagi davlat mukofotiga sazovor bo‘ldi.

Iroda Jumanova dzyudo bo‘yicha sport ustasi, yoshlar o‘rtasida Osiyo ochiq kubogi g‘olibi. Dilnoza Kamolova ham dzyudo bo‘yicha sport ustasi, u dzyudo, milliy kurash, sambo kurashi bo‘yicha 13 karra O‘zbekiston, bir karra Osiyo chempionligiga sazovor bo‘lgan.

Mahliyo Mannonova esa dzyudo bo‘yicha xalqaro toifadagi sport ustasi, 2014 yilda Xitoy davlatida, 2015 yil Tailandda o‘tkazilgan Osiyo chempionatida kumush medalni, 2016 yil Hindistonda o‘tkazilgan qit’a chempionatida bronza medalini qo‘lga kiritdi. Farzandning ma’naviy komilligi, xususan qiz bolaning xalqimizning asriy an’ana, qadriyat va udumlar asosida kamolotga erishuvi, uni oilaga tayyorlash, ro‘zg‘or yumushlariga o‘rgatish, sarishtalik, pazandalik va chevarlik kabi fazilatlarni o‘zlashtirishi har doim e’tiborda bo‘lishi kerak. Mahliyoning onasi Muxlisa Hamroeva qizi pazanda ekanligi, shuningdek to‘quvchilik hunari borligini faxr bilan ta’kidlaydi. Uning singillari Madinaxon va Niginaxonlar ham Zarafshon shahridagi Tibbiyot kollejida tahsil olish barobarida sportning voleybol turi bo‘yicha o‘smirlar o‘rtasida O‘zbekiston milliy terma jamoasi a’zosi ham hisoblanishadi. Kenja ukasi Karimjon Uchquduqdagi umumta’lim maktabida 5-sinfda o‘qib, “Lochin” sport majmuasining milliy kurash to‘garagiga qatnaydi.

Alisher Shodmonov yosh dzyudochi va sambochilarning professional darajasiini oshirish borasida tinmay izlanadi. Uning shogirdlari xalqaro musobaqalarda bir necha bor g‘oliblik va sovrindorlikni qo‘lga kiritishgan. Bugungi kunda qator yoshlarni jahon va qit’a chempionatlariga tayyorlamoqda. Sabrina Qo‘ldosheva, Umida Normurodova, Yulduz Ne’matova, Marjona Tursunova, Ahrorxon Jo‘raxonov, Diana Mustafaeva, Firdavs Jumaev, So‘g‘diyona Xamzaeva kabi umidli sportchilar O‘zbekiston milliy terma jamoasi a’zosi sifatida ko‘plab tadbirlarda sovrinli o‘rinlarni qo‘lga kiritishmoqda. 

Uchquduqlik sportchilarning muvaffaqiyati yurtimizda sportni rivojlantirishning yaxlit tizimi yaratilgani, har tomonlama sog‘lom va barkamol avlodni tarbiyalash ishiga davlat siyosati darajasida ustuvor ahamiyat qaratilayotgani samarasidir. “Lochin” sport majmuasi hali ko‘plab iqtidorli sportchilar uchun mahorat maktabi vazifasini o‘taydi. Unda tarbiya topayotgan yigit-qizlar har doimgidek sportda yangidan-yangi natijalarni qo‘lga kiritishadi.

Azamat ZARIPOV.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №7 от 12.04.2018 UCHQUDUQNING «LOCHIN»I