Qadrli yoshlar!

Barchangizni O‘zbekiston Respublikasi yoshlari kuni munosabati bilan chin qalbimdan samimiy tabriklayman.

Shuni mamnuniyat bilan taʼkidlash joizki, taraqqiyotimizning yangi bosqichida muhtaram Yurtboshimiz Shavkat Mirziyoyev tomonidan yoshlar bilan ishlash, orzu-intilishlarini qo‘llab-quvvatlash, qobiliyat va salohiyatlarini ro‘yobga chiqarish yo‘lida mutloqo yangi tizim yaratib berildi. Bu borada ko‘plab qonun va qonunosti hujjatlari qabul qilindi. Bunday eʼtibor bugun yoshlarimiz hayotda o‘z o‘rnini topishi, barkamol shaxs timsolida kamolga yetishida muhim ahamiyat kasb etmoqda.

Mamlakatimiz olovqalb yoshlari safida shuhratli korxonamizning keng ko‘lamli islohotlarga beqiyos hissa qo‘shib kelayotgan 14 mingga yaqin yigit-qizlari ham borligi, sizlar faoliyatimizda katta kuch sifatida namoyon bo‘layotganliklaringiz qalbimizga cheksiz faxru iftixor bag‘ishlaydi. Quvonarli jihati, safimizga minglab yoshlarning kirib kelayotgani bois jamoamiz borgan sari yosharib borishini taʼminlamoqda. Ayni paytda ishchi-xodimlarimiz o‘rtacha yoshi o‘ttiz yettida, rahbar-xodimlarning o‘ttiz foizi o‘ttiz yoshgacha bo‘lgan, ko‘zlari yonib turgan yigit-qizlar ekanligi, tashabbuskor yoshlarimiz Qizilqum sahrosida biz bilan yonma-yon ishlab, o‘zlarini ko‘rsatib kelayotganliklari, g‘ayrat-shijoati va yutuqlari eʼtirof etishga arzigulikdir.

Kombinat rahbariyati istiqbolli, isteʼdodli yoshlarni har tomonlama qo‘llab-quvvatlash, orzu-maqsadlarini ro‘yobga chiqarishga doimiy tarzda eʼtibor qaratib kelayapti. Turli ko‘rik-tanlovlar tashkil etilgani, yoshlarga katta ishonch bildirib muhim rahbarlik lavozimlariga tayinlanayotgani, rahbar va yoshlar uchrashuvlari fikrimiz tasdig‘idir. Bundan keyin ham biz sizlarning har qanday taklif va tashabbuslaringizni tinglashga, qo‘llab-quvvatlashga tayyormiz. Chunki bizning barcha ishonch va umidimiz sizlardan. Shunday ekan, mavjud imkoniyatlardan oqilona foydalanib, oldingizga qo‘ygan maqsad va marralarga erishishingiz, bilim va mehnatingizni kombinatimiz ravnaqiga to‘la safarbar etishlaringizga ishonaman.

Aziz yoshlar!

Yana bir bor Yoshlar kuni munsabati bilan qutlar ekanman, sizlarga mustahkam sog‘lik-salomatlik, g‘ayrat-shijoat, sharafli va masʼuliyatli ishlaringizda ulkan zafarlar tilayman.

Quvondiq SANAQULOV,

“Navoiy kon-metallurgiya kombinati” aksiyadorlik jamiyati

Boshqaruvi raisi – Bosh direktori.