• Yaratildi: 31.08.2022
• Yangilandi: 31.08.2022
• O'qildi: 1980

Xalqaro kompaniya vakillari bilan uchrashuv bo‘lib o‘tdi

Yaqinda “NKMK” AJ boshqarmasida “Navoiy kon-metallurgiya kombinati” aksiyadorlik jamiyatining raqamli transformatsiya strategiyasini ishlab chiqish bo‘yicha kombinat rahbariyati va Boston Consulting Group (BSG) (AQSh) xalqaro kompaniyasi vakillari bilan uchrashuvi bo‘lib o‘tdi.

Uchrashuvda taʼkidlanganidek, “NKMK” AJning raqamli transformatsiyasi O‘zbekiston iqtisodiyoti tarmoqlarini keng ko‘lamli isloh qilish va modernizatsiya qilish ishlari doirasida amalga oshirilmoqda. Raqamli transformatsiya raqamli yechimlar yordamida ishlab chiqarish jarayonlarni optimallashtirish, shuningdek, kombinatni zamonaviy yuqori texnologik kompaniyaga aylantirish uchun asos yaratish orqali faoliyatining samaradorligini oshirishga qaratilgan. Uch bosqichdan iborat NKMKning raqamli transformatsiya dasturi 2025-yilgacha mo‘ljallangan bo‘lib, joriy yilda tayyorgarlik ishlari olib boriladi.

Shuningdek, uchrashuvda kombinatning muhim raqamli loyihalari 1C platformasi asosida moliyaviy hisobotlarni avtomatlashtirish, ish haqi, xodimlarni hisobga olish va xarid faoliyatini avtomatlashtirish hamda ishga tushirilayotgan gidrometallurgiya zavodlarida ishlab chiqarish jarayonlarini avtomatlashtirish tizimlarini joriy etishni o‘z ichiga olishi taʼkidlab o‘tildi.

Bundan tashqari, uchrashuvda kombinat rahbariyati va Boston Consulting Group kompaniyasi vakillari tomonidan korxonaning raqamli transformatsiyasini amalga oshirish bosqichlari batafsil muhokama qilindi.

Maʼlumot uchun, BSG jahon hamda MDH miqyosida konchilik va  metallurgiya tarmog‘ida, axborot texnologiyalar strategiyasini ishlab chiqish, raqamli transformatsiya va kon-metallurgiya kompaniyalarining faoliyati samaradorligini oshirish bo‘yicha loyihalarni amalga oshirishda katta tajribaga ega. Xususan, mazkur kompaniya O‘zbekistonda 5 yildan buyon sanoatni rivojlantirish va mamlakatning asosiy tarmoqlari uchun strategiyalarni ishlab chiqish bo‘yicha muvaffaqiyatli ishlab kelmoqda.

“NKMK” AJ Matbuot xizmati.