• Yaratildi: 05.05.2023
• Yangilandi: 05.05.2023
• O'qildi: 2529

Muhim investitsion loyihalar amalga oshirilmoqda

Bugungi kunda Navoiy kon-metallurgiya kombinati tomonidan maʼdan qazib olish va qayta ishlash quvvatlarni kengaytirishga qaratilgan yirik investitsion loyihalar amalga oshirilmoqda.

Jumladan, 2022-yilda Tomdi tumani hududida “Balpantog‘” va “Tomdibuloq” konlarini o‘zlashtirish bo‘yicha oltin tarkibli maʼdan qazib olish ishlari boshlangan edi. Loyiha doirasida mazkur konlardan yiliga 3 mln tonna oltin tarkibli maʼdan qazib olish rejalashtirilgan.

O‘tgan vaqt mobaynida “Balpantog‘” va “Tomdibuloq” konlaridan qariyb 4 mln kubometr tog‘ jinslari qazib olinib, 1 mln tonnaga yaqin oltin tarkibli maʼdan temir yo‘l orqali 2 va 5-gidrometallurgiya zavodlariga qayta ishlash uchun yetkazildi.

Hozirda konlarda maʼdan qazib olish ishlarida ekskavatorlar, avtoag‘dargichlar, burg‘ilash uskunalari, buldozerlar, frontal yuklagichlar kabi zamonaviy konchilik texnikalaridan keng foydalanilmoqda. Shuningdek, mazkur loyiha doirasida qariyb 500 ta yangi ish o‘rinlari yaratildi. Eʼtiborlisi, Tomdi tumani aholisi bandligiga ko‘maklashish maqsadida ishsiz bo‘lgan mahalliy aholi vakillari “NKMK” AJning Zarafshon shahridagi o‘quv markazida kon-metallurgiya sohasiga mos bo‘lgan kasb va mutaxassisliklar bo‘yicha qayta tayyorlanib, ishga qabul qilindi.

Bunday istiqbolli loyihalar kombinatni rivojlantirishga xizmat qilishi bilan birga, hududning infratuzilmasini yaxshilashda ham muhim ahamiyatga egadir.

“NKMK” AJ Matbuot xizmati.