• Yaratildi: 08.05.2023
• Yangilandi: 08.05.2023
• O'qildi: 872

Xotira mangu, qadr ulug‘

O‘zbekiston Respublikasi Prezidentining shu yil 2-maydagi “Ikkinchi jahon urushi qatnashchilarini rag‘batlantirish to‘g‘risida”gi farmoniga asosan Navoiy kon-metallurgiya kombinatida ham 9-may – Xotira va qadrlash kunini keng nishonlashga qizg‘in hozirlik ko‘rilmoqda.

Kombinat maʼmuriyati va kasaba uyushmasi Kengashi hamda konchilik va metallurgiya sanoati faxriylari Kengashi tomonidan umumxalq bayrami arafasida turli hududlarda istiqomat qilib kelayotgan front ortida xizmat qilgan yurtdoshlarimiz hamda NKMK faxriylari xonadonlariga borib, ulardan ko‘ngil so‘rash, Xotira va qadrlash kuni hamda Ikkinchi Jahon urushida erishilgan g‘alabaning 78 yilligi bilan tabriklash, sovg‘a-salomlar ulashishga doir chora-tadbirlar belgilandi.

Bayram arafasida Samarqand viloyati Nurobod tumani “Ulus” qishlog‘ida yashovchi 90 yoshli otaxon Do‘sat Saparov, Toshkent shahrida yashovchi 96 yoshli onaxon Madina momo Amineva, Toshkent viloyati Krasnogorsk shaharchasida yashovchi 100 yoshli onaxon Magmura Tulayeva, Zarafshon shahrida yashovchi 96 yoshli otaxon Fyodor Orishak va 93 yoshli otaxon Vasiliy Firsov kabi 18 nafar nuroniylar xonadonida bo‘lishdi.

Muloqot chog‘ida otaxon va onaxonlar urush davridagi qiyinchiliklar haqida so‘zlab, bugungi dorilomon kunlar, bebaho neʼmat bo‘lgan tinchlik qadriga yetish kerakligini, yurtimizda keksalarga bo‘lgan hurmat-eʼtibordan mamnunligini bildirdi.

Bu kabi tadbirlar Navoiy, Toshkent, Zarafshon, Uchquduq va Nurobod shaharlari buylab davom etmoqda...

“NKMK” AJ Matbuot xizmati.