• Yaratildi: 22.05.2023
• Yangilandi: 22.05.2023
• O'qildi: 2666

Innovatsion yo‘nalishda hamkorlik memorandumi imzolandi

22-may kuni “NKMK” AJ boshqarmasida Navoiy kon-metallurgiya kombinati rahbariyati va mutaxassislari hamda O‘zbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlantirish agentligi vakillarining uchrashuvi bo‘lib o‘tdi.

Uchrashuvda innovatsion yo‘nalishda ikki tomonlama o‘zaro hamkorlikni yana-da rivojlantirish masalasini muhokama etlildi. Tadbirda so‘z olgan Innovatsion rivojlantirish agentligi direktori Olimjon To‘ychiyev bu uchrashuv agentlik va kombinat o‘rtasida innovatsion yo‘nalishdagi aloqalarni mustahkamlashga xizmat qilishi, hamkorlikka keng yo‘l ochishini alohida eʼtirof etdi.

Ochiq muloqot davomida mutaxassislar tomonidan kombinat iqtisodiy, innovatsion salohiyati, korxonani rivojlantirishga qaratilgan istiqbolli dasturlar haqida batafsil maʼlumot berildi.

Mazkur uchrashuv doirasida kombinat va agentlik o‘rtasida konchilik va metallurgiya sohasida innovatsion yechimlarni ishlab chiqish va joriy etish bo‘yicha hamkorlikni rivojlantirish to‘g‘risida ikki tomonlama hamkorlik memorandumi imzolandi.

Kombinatga tashrif davomida agentlik vakillari “1-GMZ” kon boshqarmasi, Navoiy mashinasozlik zavodi, Ishlab chiqarishni avtomatlashtirish boshqarmasi, Markaziy ilmiy-tadqiqot laboratoriyasida bo‘lib, mazkur bo‘linmalarda ishlab chiqarish jarayonlari bilan yaqindan tanishdi.   

 “NKMK” AJ Matbuot xizmati.