• Yaratildi: 08.09.2023
• Yangilandi: 08.09.2023
• O'qildi: 1784

Kombinat hududiy tarmoqlararo sanoat yarmarkasida faol ishtirok etdi

2023-yil 7-8-sentabr kunlari Navoiy shahridagi “Kimyogar” sport majmuasining yopiq zalida tog‘-kon metallurgiyasi, elektrotexnika, kimyo sanoati va qurilish materiallari sohalariga ixtisoslashgan hududiy tarmoqlararo sanoat yarmarkasi bo‘lib o‘tdi. Mazkur yarmakada “Navoiy kon-metallurgiya kombinati” aksiyadorlik jamiyati ham faol ishtirok etdi.

Yarmarka tantanali ochilish marosimida “NKMK” AJ Boshqaruvi raisi – Bosh direktori Q.Sanaqulov so‘zga chiqib, keyingi yillarda kombinat tomonidan mahalliylashtirish, import o‘rnini bosuvchi mahsulotlar ishlab chiqarish, sanoat kooperatsiyasini kengaytirish yo‘nalishida olib borilgan keng ko‘lamli ishlar to‘g‘risida ishtirokchilarga maʼlum qildi.

Jumaladan, kombinat tomonidan joriy yilda 621,3 mlrd so‘mlik mahalliylashtirilgan mahsulot ishlab chiqarish rejalashtirilgan. Shu yilning o‘tgan sakkiz oyida 163 ta loyiha bo‘yicha 435,4 mlrd so‘mlik mahsulot ishlab chiqarish orqali import hajmini kamaytirishga erishildi. Kombinat va mahalliy ishlab chiqaruvchilar o‘rtasida kooperatsiya aloqalarini kengaytirish maqsadida texnologik hamkorlik yaʼni “shatakka olish” mexanizmi muvaffaqiyatli joriy etildi. Bugungi kunda kichik korxonalar bilan birgalikda kombinat ishlab chiqarish ehtiyojlari uchun 100 dan ziyod yangi turdagi mahsulotlar o‘zlashtirilmoqda. 2023-yilning sakkiz oyida kombinat tarmoqlararo kooperatsiya doirasida mahalliy ishlab chiqaruvchilardan 3,6 trln so‘mlik mahsulotlar xarid qildi. 

 

“NKMK” AJ Matbuot xizmati.