• Yaratildi: 13.10.2023
• Yangilandi: 13.10.2023
• O'qildi: 1610

Professionallik, tezkorlik va sifat

NKMK tashkil topganligining 65 yilligiga

Gidrometallurgiya ishlab chiqarishi turli jarayonlarning ko‘p qirrali va murakkab zanjiri bo‘lib, unda har bir mexanizm muhim ahamiyat kasb etadi.

Markaziy zavod laboratoriyasi “NKMK” AJ 3-gidrometallurgiya zavodining asosiy xizmatlaridan biri bo‘lib, keng ko‘lamli sinovlarni amalga oshiradi. Xususan, laboratoriya mutaxassislari maʼdan tarkibidagi oltin miqdori, konlardan qazib olingan maʼdan, reagentlar tarkibini aniqlash uchun sutkasiga 450 ga yaqin namunalar tahlilini olib boradilar. Shuningdek, bu yerda suv namunalari tahlil qilinadi, texnologik suvlarning tarkibi nazorat qilinadi, chunki suv tarkibi gidrometallurgiya ishlab chiqarishda muhim ahamiyatga ega. Ushbu tadqiqotlarning barchasi korxona ishlab chiqarish ko‘rsatkichlarini yaxshilashga qaratilgan.

Bugungi kunda laboratoriyada 100 dan ortiq ishchi-xodim faoliyat olib borib, ularning o‘rtacha yoshi 35 yoshni tashkil etadi va 75 foizi ayollardir. Laboratoriya tarkibida tahlil guruhi, fazalarni nazorat qilish guruhi va texnologik tadqiqot guruhi mavjuddir. 2020-yildan buyon laboratoriyaga qariyb 20 yillik ish stajiga ega tajribali va yuqori malakali mutaxassis Odinaxon Mirzoyeva rahbarlik qilib kelmoqda.

Laboratoriya jamoasi yoshlardan iborat bo‘lishiga qaramay, uning barcha xodimlari doimiy ravishda yangi ish usullarini izlab topish ustida mehnat qiladilar. Shu tufayli Markaziy zavod laboratoriyasi ishchi-xodimlarining faoliyati bu professionallik, tezkorlik va sifatdir.

“NKMK” AJ Matbuot xizmati.