• Yaratildi: 17.11.2023
• Yangilandi: 17.11.2023
• O'qildi: 1286

Navoiy shahrida NKMKning 65 yilligi nishonlandi

17-noyabr kuni Navoiy shahridagi "Farhod" madaniyat saroyida Navoiy kon-metallurgiya kombinati tashkil topganligining 65 yilligiga bag‘ishlangan bayram tantanasi o‘tkazildi. 

Bayram tantanasida kombinat ishchi-xodimlari va faxriylari, keng jamoatchilik vakillari ishtirok etishdi.

Tantanada O‘zbekiston Respublikasi Bosh vaziri Abdulla Aripov O‘zbekiston Respublikasi Prezidenti Shavkat Mirziyoyevning Navoiy kon-metallurgiya kombinati jamoasiga yo‘llagan bayram tabrigini o‘qib eshittirdi.

Shuningdek, tadbirda O‘zbekiston Respublikasi Prezidentining "Navoiy kon-metallurgiya kombinati" aksiyadorlik jamiyati tashkil etilganining 65 yilligi munosabati bilan ishlab chiqarish ilg‘orlaridan bir guruhini mukofotlash to‘g‘risida"gi Farmoniga muvofiq Navoiy kon-metallurgiya kombinatining bir guruh ishchi-xodimlariga yuksak davlat mukofotlari topshirildi.

Tadbirda Navoiy viloyati hokimi Normat Tursunov so‘zga chiqib, Navoiy kon-metallurgiya kombinati jamoasini bayram bilan tabrikladi.

“NKMK” AJ Boshqaruvi raisi – Bosh direktori Quvondiq Sanaqulov tadbir ishtirokchilarini Navoiy kon-metallurgiya kombinati tashkil topganligining 65 yilligi bilan samimiy muborakbod etdi.

Bayram tadbirida "Farhod" madaniyat saroyi ijodkorlari tomonidan tayorlangan konsert dasturi namoyish etildi. O‘zbekistonda xizmat ko‘rsatgan artistlar Alisher Fayz va Sevara Nazarxon, O‘zbekiston xalq artisti Gulsanam Mamazoyitovalar kuy-qo‘shiqlarini ijro etishdi.

“NKMK” AJ Matbuot xizmati.