• Yaratildi: 15.12.2023
• Yangilandi: 15.12.2023
• O'qildi: 1592

Davlat mukofoti sohiblari bilan uchrashuvlar

Navoiy kon-metallurgiya kombinatida samarali faoliyat yuritib, mamlakatimizning iqtisodiy qudratini yuksaltirishga o‘z hissasini qo‘shib kelayotgan ishchi-xodimlar mehnati munosib eʼtirof etilmoqda.

Xususan, O‘zbekiston Respublikasi Prezidentining 2023-yil 16-noyabrda imzolangan Farmoniga muvofiq kombinat tashkil etilganining 65 yilligi munosabati bilan korxona ishchi-xodimlarining bir guruhi yuksak davlat mukofotlari bilan taqdirlangan edi. Ular orasida "NKMK" AJ bosh marksheyderi Shuhrat Sadinov va Shimoliy kon boshqarmasi byudjetlashtirish va kontrolling bo‘limi boshlig‘i Maya Tsoy “Do‘stlik” ordeni, 4-gidrometallurgiya zavodi direktori Asqar Zokirov, "Zarmitan" koni lahimchisi Razzoq Bekqulov, Navoiy mashinasozlik zavodi Quymachilik sexi boshlig‘i Zafar Bobodo‘stov va 1-gidrometallurgiya zavodi apparatchisi To‘lqin Irgashevlar "Shuhrat" medaliga sazovor bo‘lishdi.

Jumladan, Shimoliy kon boshqarmasida “Do‘stlik” ordeni sohibi M.Tsoy bilan uchrashuv bo‘lib o‘tdi. Uchrashuvda davlat mukofoti sohibining bolalik yillari va ko‘p yillik mehnat faoliyatiga bag‘ishlangan rolik namoyish etildi. Shunungdek, Qo‘shrabot tumanidagi Zarkent qo‘rg‘onida davlat mukofoti sohiblari A.Zokirov va R.Bekqulovlar hamda Navoiy mashinasozlik zavodida “Do‘stlik” ordeni sohibi Sh.Sadinov, "Fidokorona xizmatlari uchun" ordeni sohibi F.Hamdamov, "Shuhrat" medali sohiblari Z.Bobodo‘stov va T.Irgashevlar bilan uchrashuvlar bo‘lib o‘tdi. Tadbirlarda zamonamiz qahramonlari kombinatda olib borayotgan mehnat faoliyati to‘g‘risida o‘z fikr-mulohazalarini bildirishdi. 

Tadbirlarda taʼkidlanganidek, bu davlat mukofotlari ishchi-xodimlarni qo‘llab-quvvatlash, orzu-intilishlarini amalga oshirish va jamiyat hayotida yanada faolroq va tashabbuskorroq bo‘lishi uchun muhim zamin yaratadi.

“NKMK” AJ Matbuot xizmati.