• Yaratildi: 28.12.2023
• Yangilandi: 28.12.2023
• O'qildi: 1025

Xayrli tashabbuslar bardavom bo‘lsin

IJTIMOIY_MASʼULIYAT

Navoiy kon-metallurgiya kombinati ijtimoiy masʼuliyatni zimmasiga olib pensionerlar, yolg‘iz keksalar, kam taʼminlangan oilalar, bolajonlarni moddiy va maʼnaviy qo‘llab-quvvatlashga alohida eʼtibor qaratmoqda. Turli bayramlar, jumladan, Yangi yil arafasida kombinat rahbariyati va kasaba uyushmasi Kengashi hamkorligida xayrli ishlar amalga oshirilyapti.

Yangi yil arafasida kombinat maʼmuriyati, kasaba uyushmasi Kengashi, O‘zbekiston Respublikasi konchilik va metallurgiya sanoati faxriylari kengashi Navoiy filiali hamkorlikda xayrli ishlarni pensionerlar holidan xabar olishdan boshladi. Qutlug‘ ayyom kunlari 1 938 nafar pensionerlar xonadonlariga borib, nuroniylarga mehr-muruvvat ko‘rsatdi. Jumladan, 320 nafar pensionerning har biriga 500 ming so‘mdan moddiy yordam, 1 600 nafar pensionerga choyshab, 12 nafariga oziq-ovqat jamlanmasi, 3 nafar pensionerga eshitish moslamasi va 3 nafar pensionerga nogironlik aravachasi yetkazib berildi. Bu g‘amxo‘rlikni davom ettirgan holda, kasaba uyushma Kengashining “Birdamlik” fondidan 102 nafar yordamga muhtoj kombinat ishchi-xodimlari va ishlamaydigan pensionerlarga 228 million so‘mlik moddiy yordam ko‘rsatildi.

“Navoiy kon-metallurgiya kombinati” AJ, “Navoiyuran” davlat korxonasi, “NKMK jamg‘armasi” davlat muassasasida mehnat qilayotgan kam taʼminlangan, ijtimoiy himoyaga muhtoj 2 000 nafar pensionerlar, yolg‘iz pensionerlar, ishlab chiqarishda baxtsiz hodisa oqibatida nogiron bo‘lgan hamda kam taʼminlangan ishchi-xodimlarga, shuningdek, oila aʼzolari vafot etganlarga bayramona oziq-ovqat mahsulotlari to‘plamlari yetkazildi va moddiy yordam ko‘rsatildi.  

Yangi yil bayrami hammadan ham ko‘ra, aziz bolajonlarimiz uchun qiziqarli va quvonchli ekani bilan alohida ahamiyatga ega. Shu munosabat bilan, kombinat tomonidan har yili bolajonlarga Yangi yil sovg‘alarini ulashish anʼanaga aylangan. Joriy yilda ham ishchi-xodimlarning 1-10 yoshli jajji farzandlari uchun bayram sovg‘alari to‘plami tayyorlandi. Jumladan, “Navoiy kon-metallurgiya kombinati” AJ ishchi-xodimlarining farzandlariga 43,4 mingta, “Navoiyuran” davlat korxonasi ishchi-xodimlarining farzandlariga 7,6 mingta “NKMK jamg‘armasi” davlat muassasasi ishchi-xodimlarining farzandlariga 5 mingdan ortiq sovg‘alar ulashildi.

Kombinatimiz tomonidan homiylik va xayriya sifatida viloyatimizda joylashgan maktab-internatlari tarbiyalanuvchilari, kam taʼminlangan oilalar, ko‘zi ojizlar, karlar jamiyatlariga 2,4 mingta Yangi yil sovg‘alari yetkazildi. Shuningdek, kombinat madaniyat xodimlari, sportchilari, Navoiy davlat konchilik va texnologiyalar universiteti, Nukus konchilik instituti va akademik litsey ishchi-xodimlarining 2,5 ming nafar farzandlari ham bunday eʼtibordan chetda qolmadi.

Kombinat vakillari shu yilning 26-dekabr kuni Qiziltepa tumanidagi 36-ixtisoslashtirilgan maktab-internati Yangi yil bayramida ishtirok etib, 265 nafar bolajonlarga sovg‘a-salomlar topshirildi. 

Yana shuni mamnuniyat bilan taʼkidlash kerakki, har yili Yangi yil bayrami munosabati bilan bolajonlarimiz uchun bayram tadbirlari, teatrlashtirilgan tomoshalarni tashkil etish anʼanaga aylangan. Bu yil ham Navoiy shahridagi “So‘g‘diyona” jismoniy tarbiya va sport majmuasida, qolaversa, Zarafshon, Uchquduq, Nurobod shaharlari, Zarkent, Zafarobod qo‘rg‘onlari, Marjonbuloq shaharchasida “Navoiy kon-metallurgiya kombinati” AJ, “Navoiyuran” davlat korxonasi, “NKMK jamg‘armasi” davlat muassasasida mehnat qilayotgan ishchi-xodimlar, shuningdek, ushbu hududlarda yashovchi aholining 50 ming nafardan ziyod farzandlari uchun bayram tadbirlari o‘tkazilishi mo‘ljallangan. Ayni paytda joylarda o‘tayotgan bayram tadbirlari jajji o‘g‘il-qizlarimizga bayramona kayfiyat bag‘ishlamoqda.

Zero, aholining ijtimoiy himoyaga muhtoj, kam taʼminlangan, nochor qatlamiga alohida eʼtibor qaratish, o‘zgalar ko‘magiga muhtoj va yolg‘iz keksalar holidan xabar olish, ularni ko‘nglini ko‘tarish, beg‘araz yordam qo‘lini cho‘zish kombinat jamoasining savobli amallaridan biridir. Bu kabi xayrli ishlar, azaliy anʼanalar bundan keyin ham kombinat maʼmuriyati va kasaba uyushmasi Kengashining birinchi darajali vazifasi bo‘lib qolaveradi.

“NKMK” AJ Matbuot xizmati.