• Yaratildi: 16.01.2024
• Yangilandi: 16.01.2024
• O'qildi: 1648

Ratsionalizatorlik taklifining amaliy samarasi

Navoiy kon-metallurgiya kombinatida izlanuvchan yosh ishchi-xodimlarning ratsionalizatorlik takliflari qo‘llab-quvvatlanib, korxonaga iqtisodiy samara keltirmoqda. Bunday natijadorlikka erishishda Markaziy kon boshqarmasi bo‘linmalarida ishlaydigan yoshlar ham faol ishtirok etib kelayapti.

Xususan, Xayrullo Bo‘riyev, Valijon Musayev, Uchqun Boynazarov, Jo‘rabek Hikmatovlar Temiryo‘l transporti boshqarmasining izlanuvchan yosh mutaxassislaridan. Ular bir necha yildan buyon yangi ratsionalizatorlik takliflari ustida hamkorlikda ishlashmoqda. Ular tomonidan boshqarmaning lokomotiv deposida teplovoz dizel dvigatelining yuqori bosimli yoqilg‘i nasoslarini sinash stendi ularning ratsionalizatorlik taklifi asosida yaratildi.

Shu kunga qadar boshqarmada yoqilg‘i nasoslarni taʼmirlash uchun bunday sinash stendi mavjud emas edi. Ratsionalizatorlarning taklifi ishlab chiqarishga joriy etilgach, teplovozlarning dizel yoqilg‘isi sarfi hamda texnologik jarayonning muddati sezilarli darajada kamaydi. Ushbu ratsionalizatorlik taklifi qo‘llanilishi evaziga korxonada yiliga 670 mln so‘mdan ortiq iqtisodiy samaraga erishilmoqda. Bundan tashqari teplovozlarning dizel generatorlari sifatli va barqaror ishlashi taʼminlanayapti.

Kombinatda ixtirochi va ratsionalizatorlarning qo‘llab-quvvatlanayotgani, iqtisodiy samara beradigan takliflari moddiy va maʼnaviy rag‘batini topayotgani, bu borada alohida tanlovlar tashkil etilayotgani yosh mutaxassislarni yangiliklar yaratishga undamoqda.

“NKMK” AJ Matbuot xizmati.