• Yaratildi: 23.01.2024
• Yangilandi: 23.01.2024
• O'qildi: 1742

2023-yil sarhisobi: ijtimoiy masʼuliyat

“Navoiy kon-metallurgiya kombinati” AJ ijtimoiy masʼuliyatni zimmasiga olib, hududlarni ijtimoiy-iqtisodiy rivojlantirish,  sport va olimpiya harakatini qo‘llab-quvvatlash, ijtimoiy himoyaga muhtoj insonlarga yordam ko‘rsatishga alohida eʼtibor qaratmoqda.

Xususan, 2023-yilda viloyatimizda kombinat mablag‘lari hisobidan qator bunyodkorlik ishlari amalga oshirilib, zamonaviy ijtimoiy obyektlar barpo etildi. O‘tgan yilda Tomdi tumanida NKMK tomonidan qurilgan zamonaviy 504 o‘rinli  ixtisoslashtirilgan maktab-internati foydalanishga topshirildi. Shuningdek, Qiziltepa tumanidagi “To‘dako‘l” dam olish bazasida Xalqaro shaxmat maktabi barpo etildi. “Balpantov”, “Tomdibuloq”, “Turbay” konlari va “Adjibugut” karyerida ishchi-xodimlar uchun yangi yotoqxona va oshxonalar qurilib foydalanishga topshirildi.

2023-yil yakunlari bo‘yicha O‘zbekiston sportida eng yaxshilarni aniqlash uchun o‘tkazilgan “Milliy sport mukofoti” taqdirlash marosimida “NKMK” AJ “Olimpiya harakatini qo‘llab-quvvatlashga qo‘shgan hissasi uchun” nominatsiyasi g‘olibi sifatida eʼtirof etildi.

Yangi yil bayrami arafasida kombinat maʼmuriyati va kasaba uyushmasi Kengashi hamkorligida bir qator xayrli ishlar amalga oshirildi. Jumladan, qariyb 2 ming nafar pensionerlar holidan xabar olinib, ularga moddiy yordam ko‘rsatildi hamda oziq-ovqat jamlanmalari, nogironlik aravachalari va eshitish moslamalari topshirildi. Shuningdek, kombinatda mehnat qilayotgan kam taʼminlangan, ijtimoiy himoyaga muhtoj va yolg‘iz pensionerlar, nogiron hamda kam taʼminlangan ishchi-xodimlar, oila aʼzolari vafot etganlarga bayramona oziq-ovqat mahsulotlar to‘plamlari yetkazildi va moddiy yordam ko‘rsatildi.

Kombinat tomonidan har yili bolajonlarga Yangi yil sovg‘alarini ulashish anʼanaga aylangan. O‘tgan yilda kombinat ishchi-xodimlarning 1 yoshdan 10 yoshgacha bo‘lgan 43,4 ming nafar farzandlariga bayram sovg‘alari ulashildi. Homiylik va xayriya sifatida viloyatimizda joylashgan maktab-internatlari tarbiyalanuvchilari, kam taʼminlangan oilalar, ko‘zi ojizlar, karlar jamiyatlariga 2,4 mingta bayram sovg‘alari yetkazildi.  

Ijtimoiy himoyaga muhtoj insonlarga alohida eʼtibor qaratish, o‘zgalar ko‘magiga muhtoj va yolg‘iz keksalar holidan xabar olish, ularni ko‘nglini ko‘tarish, beg‘araz yordam qo‘lini cho‘zish kombinat jamoasining savobli amallaridan biridir. Bu kabi xayrli ishlar bundan keyin ham tizimli ravishda davom ettiriladi.

“NKMK” AJ Matbuot xizmati.