• Yaratildi: 13.03.2024
• Yangilandi: 13.03.2024
• O'qildi: 114

Tafakkur xazinasi

Kitob va kutubxonalar azal-azaldan insonlar uchun ma’naviyat va ma’rifat maskani bo‘lib kelgan. Ziyo istagan qalblar uchun kitob doimo ular hayotining ajralmas qismi sanalgan. Yurtimizda xalqimiz, ayniqsa, yoshlar orasida kitob mutolaasiga, kutubxonalar faoliyatiga alohida e’tibor qaratilmoqda.

Bugungi kunda Navoiy kon-metallurgiya kombinati ma’muriyati, kasaba uyushmasi Kengashi tomonidan ishchi-xodimlar, ularning oilasi va farzandlari bo‘sh vaqtlarini mazmunli o‘tkazishlari uchun barcha imkoniyat va sharoitlar yaratib berilmoqda. Ishchi-xodimlarning ma’naviy saviyasini yuksaltirish kombinatda ustuvor vazifalar sirasiga kiradi.

Insoniyat tarixi va madaniyati asrlar osha shakllanib, rivoj topib kelmoqda. Bular haqida ma’lumotlar bizgacha faqat kitob orqali yetib kelgan, desak mubolag‘a qilmagan bo‘lamiz. Darhaqiqat, kitob – insoniyatning bebaho xazinasidir! Kombinatimiz kutubxonalarida doimiy tarzda o‘tkaziladigan ma’naviy-ma’rifiy tadbirlar yoshlarning intellektual salohiyati, ongu tafakkuri va dunyoqarashini boyitish, kitobxonlik madaniyatini rivojlantirishga xizmat qilmoqda. Yoshlar ma’naviy jihatdan qanchalik yetuk bo‘lishsa, turli yot illatlarga qarshi immuniteti shunchalik mustahkam bo‘ladi.

Kombinat tasarrufidagi 5 ta texnik kutubxona hamda “NKMK jamg‘armasi” davlat muassasasiga qarashli Navoiy, Zarafshon, Uchquduq, Nurobod, Zafarobod shaharlarida joylashgan kutubxonalarning umumiy kitob fondi 562 ming 419 nusxadan iborat. Bu ziyo maskanlari kombinat ishchi-xodimlari, ularning oila a’zolari, yoshlar, hududda istiqomat qiluvchi aholi uchun xizmat qilmoqda. Kutubxonalarga har yili o‘rtacha 25-30 ming nafarga yaqin kitobxonlar tashrif buyurmoqda.

Eng quvonarlisi, kombinat tashabbusi bilan http://kitob.ngmk.uz sayti ishga tushirilgan. Hozirgi kunda 158,6 ming nusxa turli xil kitob nashrlari, 14,7 ming nusxadagi jurnallar raqamlashtirilib, kitobxonlar undan bemalol foydalanishmoqda. Bu elektron tizimga kombinat, Navoiy davlat konchilik va texnologiyalar universiteti va Toshkent davlat texnika universitetidagi 10 ta kutubxona ulangan.

– Bugungi kunda kombinat texnik kutubxonalarining umumiy kitob fondi 124,5 ming nusxani tashkil etadi, – deydi “Navoiy kon-metallurgiya kombinati” AJ texnik kutubxonasi mudirasi Zulfira Badayeva. – Ular javonidan Butunjahon, mamlakatimiz konchilik va metallurgiya sanoati, Navoiy kon-metallurgiya kombinati faoliyatiga taalluqli rang-barang ilmiy, ommabop asarlar, ilmiy adabiyotlar, qo‘llanmalar, izohli lug‘atlar, shu bilan birga, davriy bosma nashrlar va boshqa yo‘nalishlardagi kitoblar joy olgan. Har yili kutubxonalarimiz fondi noyob, yangi chop etilgan kitoblar bilan to‘ldirilishi, ma’naviy merosimiz xazinasining boyishida yaxshi samara bermoqda. Oxirgi uch yilda texnik kutubxonalarimiz fondi 2,3 ming nusxadan ortiq adabiyotlar bilan to‘ldirilgani buning isbotidir.

Korxona ishchi-xodimlari, ratsionalizator va ixtirochilar, tadqiqotchilarga mazkur kutubxonalarda ko‘rsatilayotgan xizmat ularning o‘qish-o‘rganishi, ilmiy izlanishlar olib borishi uchun qo‘l kelmoqda. Ayni paytda bu muassasalarda nafaqat bosma asarlarni to‘plash, saqlash yoki ularning elektron variantlarini yaratish, balki kitobxonlikni keng targ‘ib etish va kitobxonlarga yetkazish borasida ham barcha qulayliklar yaratilgan.

– Har xil g‘oyaviy tahdid va xurujlarning ma’naviy hayotimizga ta’siri ortib borayotgan bugungi globallashuv davrida jaholatga qarshi ma’rifat bilan kurashish birinchi darajali vazifamizdir, – deydi “NKMK” AJ Ma’naviyat va ma’rifat markazi mutaxassisi Asliddin Ro‘ziyev. – Turli ma’naviy-ma’rifiy tadbirlarda kombinat kutubxonalari imkoniyatlaridan keng foydalanib, kitob va uning ahamiyatini jamoa o‘rtasida keng targ‘ib qilib kelyapmiz. Chunki insonlar ma’naviy kamolotida kitob singari kuchli qudratga ega vosita yo‘q. Shu bois, barchani, shu jumladan, hamkasblarimizni kitob o‘qishga, kutubxonalarga chorlab qolgan bo‘lardik.

Kombinat kutubxonalarining har biri boy tarixga ega. Bu nurxonalar yarim asrdan ziyod vaqtdan buyon ko‘pming kishilik mehnat jamoasi, yoshlarning savodxonligini oshirish, ularning ma’naviy dunyoqarashi yuksalishiga mustahkam poydevor vazifasini o‘tab kelyapti.

Manba: “Konchilar hayoti” gazetasining 2024-yil 7-martdagi 5-soni