• Yaratildi: 09.04.2024
• Yangilandi: 09.04.2024
• O'qildi: 1691

Markaziy Osiyoda foydalanishga topshirilgan ilk og‘ir yuk tashuvchi avtoag‘dargich

Navoiy kon-metallurgiya kombinatida transport sohasi muhim ahamiyat kasb etadi. Oltin tarkibli maʼdanlarni konlardan qazib olish, yuklash, qayta ishlash uchun gidrometallurgiya zavodlariga yetkazish va boshqa xizmatlar asosan avtotransport vositalari yordamida amalga oshirilmoqda.

Xususan, kombinat avtotransport parki yildan-yilga zamonaviy og‘ir yuk ko‘taruvchi avtoag‘dargichlar bilan kengaymoqda. Joriy yilda korxonaga yuk ko‘tarish quvvati 254 tonna bo‘lgan 10 ta “Komatsu 860E-1K” rusumli og‘ir yuk tashuvchi avtoag‘dargichlar olib kelinishi rejalashtirilgan edi. Hozirga qadar uning 4 tasi olib kelinib, ularning birinchisi mutaxassislar tomonidan Markaziy kon boshqarmasining Avtomobil transporti boshqarmasida yig‘ildi. “Muruntov” konida ish boshlagan mazkur avtoag‘dargich Markaziy Osiyoda foydalanishga topshirilgan shu rusumdagi ilk konchilik texnikasidir. Bu, O‘zbekiston Respublikasi tog‘-kon sanoatida yangi sahifa ochilayotganidan dalolatdir.

Ushbu zamonaviy kon texnikasining ish unumdorligi konda mavjud avtoag‘dargichlarga nisbatan 15 foizga ortiq bo‘lib, 5 foizgacha yonilg‘ini tejash, sarf-xarajatlarni qisqartirish imkonini beradi.

Uning yana bir o‘ziga xosligi agar avtoag‘dargichda nosozliklar paydo bo‘lsa, ular avtomatik ravishda aniqlanadi va maxsus ekranda namoyon bo‘ladi. Shuningdek, avtoag‘dargichning atrof-muhitga zararli taʼsiri nisbatan kam. 

“NKMK” AJ Matbuot xizmati.