• Yaratildi: 01.05.2024
• Yangilandi: 01.05.2024
• O'qildi: 1224

Qizilqum javohirlar sandig‘i

Qizilqum sahrosi bag‘rida joylashgan “Muruntov” koni xalqaro geologik jamoatchilik tomonidan oltin zaxirasi bo‘yicha XX asr moʻjizasi sifatida tan olingan. Bu konning ochilishi bevosita mashhur geolog olim, akademik Ibrohim Hamroboyev nomi bilan bog‘liq.

“Muruntov” koni geologlar tomonidan eng yirik oltin zaxirasiga ega kon sifatida eʼtirof etilib, uning zaxirasi 4,5 ming tonnadan ortiq baholangan. Oltin tarkibli maʼdanni qazib olish bo‘yicha dunyodagi eng yirik konlardan biri hisoblanadi.

Ayni vaqtda konning uzunligi 5,5 kilometr, kengligi 3,4 kilometr, chuqurligi 650 metrni tashkil etadi. Kondan foydalanish vaqtidan boshlab 2,2 mlrd kubometrdan ortiq tog‘ jinslari qazib olingan.

2023-yil natijalariga ko‘ra bajarilgan kon ishlari hajmi 110,6 mln kubometrni tashkil qildi. Bu ko‘rsatgich yaqin 2018-yilda bajarilgan kon ishlari hajmidan 62,2 mln kubometr yoki 78 foizga ko‘pdir.

- Bugungi kunda konda bosqichma-bosqich olib borilayotgan qazish ishlarida asosiy texnologik jarayonlar – burg‘ilash, portlatish, qazib olish va tashish ishlarida zamonaviy texnika va texnologiyalardan foydalanilmoqda. Kon chuqurligi 650 metrga yetganligini hisobga olsak, bu yerda katta hajmda ish olib borilayotganiga amin bo‘lasiz. Konni o‘zlashtirishning V navbati kelgusida kon chuqurligini 1 000 metrdan ortiq chuqurlikka yetkazish va yiliga 50 mln tonnadan ortiq maʼdan qazib olish imkonini beradi, - dedi “Muruntov” koni boshlig‘i Sherzod Kamolov.

“Muruntov” koni 2020, 2021-yillarda ketma-ket ikki marotaba “Kitco” xalqaro tahliliy markazi sarhisobiga ko‘ra, oltin qazib olish bo‘yicha jahonda birinchi o‘rinni qo‘lga kiritdi.

2022-yilda nufuzli “Forbes” nashri O‘zbekistonda maydoni bo‘yicha dunyodagi eng yirik ochiq oltin koni – “Muruntov” koni joylashganligi hamda ushbu kon dunyodagi eng yirik oltin zaxirasiga ega bo‘lishi mumkinligini qayd etilgan edi.

“NKMK” AJ Matbuot xizmati.