• Yaratildi: 06.05.2024
• Yangilandi: 06.05.2024
• O'qildi: 877

Investitsiya dasturi – amalda

Navoiy kon-metallurgiya kombinatida 2024-yilga mo‘ljallangan Investitsiya dasturi doirasida “Kokpatas va Dovg‘iztov oltin konlarida maʼdan qazib olish (III navbati)” investitsion loyihasi amalga oshirilmoqda.

Bugungi kunda mazkur loyiha bo‘yicha 3-gidrometallurgiya zavodida yiliga 2 mln tonna oltin tarkibli maʼdanni qayta ishlash quvvatiga ega 2 ta yangi tegirmon bloki barpo etilmoqda. Buning hisobiga korxonada tegirmon bloklari soni 8 taga yetib, yillik maʼdan qayta ishlash hajmini 10 mln tonnaga oshirish imkoni yaratiladi.  

- Zavodda yangi tegirmon bloklarni ishga tushirish evaziga kelgusida mahsulot ishlab chiqarish hajmi yanada oshishi kutilmoqda. Yaqin kelajakda flotatsiya, biooksidlash, filtrlash, quritish va kuydirish sexlarini kengaytirish ham ko‘zda tutilgan. Bu esa, o‘z navbatida, ishlab chiqarish surʼatini oshirishga xizmat qiladi, - deydi Shimoliy kon boshqarmasi bosh texnologi Oybek Ashurov.

Taʼkidlash joizki, mazkur tegirmon bloklari uchun zarur asbob-uskuna va ehtiyot qismlar mahaliylashtirilib, kombinatning Navoiy mashinasozlik zavodi va Shimoliy kon boshqarmasi bo‘linmalarida tayyorlanmoqda. Qurilish ishlari Zarafshon qurilish boshqarmasi tomonidan amalga oshirilmoqda.

“NKMK” AJ Matbuot xizmati.