• Yaratildi: 17.12.2021
• Yangilandi: 17.12.2021
• O'qildi: 184

Ayol – jamiyatimiz kelajagi, hayotimiz davomchisidir

So‘nggi yillarda jamiyatimizda xotin-qizlarning ijtimoiy, iqtisodiy va siyosiy faolligini oshirish, ularning xuquq va manfaatlarini himoya qilish, gender tengligini taʼminlash, yangi ish o‘rinlari yaratish, oilaviy sharoitlarini yaxshilash masalalari davlat siyosati darajasida eʼtirof etilmoqda.

Bugungi kunda Markaziy kon boshqarmasi bo‘linmalarida 2 ming 500 nafardan ortiq o‘z kasbining fidoiy, jamoat ishlarida faol, ibratli fazilatlari bilan hamkasblari orasida hurmat-eʼtibor qozonib kelaayotgan  xotin-qizlar faoliyat yuritib kelmoqda.

Joriy yil 16 dekabr kuni Markaziy kon boshqarmasining faollar zalida  “Oila mustahkamligi va masʼuliyati, oilaviy ajrimlar va ularni oldini olish” hamda  “Kasbim, oilam – mening faxrim” mavzularida maʼnaviy-maʼrifiy tadbir bo‘lib o‘tdi.

Tadbirda Navoiy viloyati xotin-qizlar jamoatchilik kengashi aʼzosi Latofat Haydarova, Navoiy shahar Alisher Navoiy jomeʼ-masjidi maʼnaviy-maʼrifiy ishlar bo‘yicha mutaxassisi Sohiba Arziqulova, “NKMK jamg‘armasi” davlat muassasasi sport va madaniyat ishlari bo‘limi boshlig‘i Nargiza Hamidovalar hamda Markaziy kon boshqarmasi va uning bo‘linmalarida faoliyat olib borayotgan faol xotin-qizlar ishtirok etishdi.

Tadbir davomida so‘zga chiqqanlar tomonidan oila muqaddas dargoh ekanligi, ayollarning oila va jamiyatdagi o‘rni, muomala madaniyati, qaynona va qaynotaga nisbatan munosabatlar, oilalardagi ajrimlarni oldini olish borasida fikr-mulohazalar bildirildi.

Shuningdek, Markaziy kon boshqarmasida faoliyat yuritayotgan xotin-qizlar uchun yaratilayotgan shart-sharoitlar, ularning intellektual va maʼnaviy yuksalishi, kasbiy hamda oilaviy majburiyatlarni hamohang tarzda bajarishlari uchun keng imkoniyatlar yuzasidan ham fikrlar bildirildi.

Maʼnaviy-maʼrifiy tadbir so‘nggida Markaziy kon boshqarmasi bo‘linmalarida fidokorona mehnat qilib kelayotgan, jamiyat va oilada o‘zining munosib o‘rniga ega, namunali oila bekalari, jamoatchilik ishlarida ham faol bir guruh xotin-qizlar kon boshqarmasi rahbariyatining tashakkurnoma va esdalik sovg‘alari bilan taqdirlandilar.

Tadbir davomida Zarafshon shahridagi “Oltin vodiy” madaniyat uyi badiiy jamoasi tomonidan jonli ijro etilgan kuy va qo‘shiqlar barchaga ko‘tarinki kayfiyat  bag‘ishladi.

S.NAZAROVA,

NKMK Oila va xotin-qizlarni

qo‘llab-quvvatlash Kengashi raisi.