• Yaratildi: 12.04.2022
• Yangilandi: 12.04.2022
• O'qildi: 2144

Osiyo suzish federatsiyasi bosh kotibi bilan uchrashuv o‘tkazildi  

12-aprel kuni “NKMK” AJ boshqarmasida “Navoiy kon-metallurgiya kombinati” aksiyadorlik jamiyati Boshqaruv raisi – Bosh direktori, O‘zbekiston suzish federatsiyasi raisi Quvondiq Sanaqulov Osiyo suzish federatsiyasi bosh kotibi Taha Sulaymon al-Kishri bilan uchrashuvi bo‘lib o‘tdi.

Uchrashuv davomida mamlakatimizda suv sporti turlarini ommalashtirish borasida amalga oshirilayotgan ishlar, shu jumladan 2025-yilda Toshkent shahri mezbonlik qiladigan yoshlar o‘rtasidagi IV yozgi Osiyo o‘yinlari uchun barpo etilayotgan suv sporti inshootlarini xalqaro talablarga mos qilib qurish masalasi muhokama qilindi.

Shuningdek, uchrashuvda joriy yilning iyun-iyul oylarida Samarqand shahrida suzish bo‘yicha ochiq havzada Osiyo chempionati (Asian Open Water) o‘tkazilishi, ushbu musobaqani yuksak saviyada tashkil etish borasidagi tayyorgarlik ishlari hozirdan boshlab yuborilganligi taʼkidlab o‘tildi.

Maʼlumot uchun, hozirda Osiyo suzish federatsiyasiga qitʼamizdagi 45 ta davlat aʼzo sanaladi.

“NKMK” AJ matbuot xizmati.