Keyingi yillarda Navoiy kon-metallurgiya kombinatining 2-gidrometallurgiya zavodida maʼdan qayta ishlash quvvatlarini kengaytirish va qimmatbaho metallar ishlab chiqarish hajmini oshirishga qaratilgan modernizatsiya va texnik yangilanish ishlari olib borilmoqda.

Bugungi kunda mazkur zavodda maydalash sexining ikkinchi binosini kengaytirish bo‘yicha qurilish-montaj ishlari davom etmoqda. O‘tgan vaqt davomida sexda qo‘shimcha 34 va 35-tegirmon bloklarining ishga tushirilishi hisobiga amaldagi tegirmonlar soni 82 taga yetkazildi. Yangi tegirmonlar ishga tushirilishi evaziga zavodda bir sutkada 163 ming tonnadan ortiq maʼdan qayta ishlanmoqda.

Maʼdan maydalash tegirmonlari uchun zarur asbob-uskuna va ehtiyot qismlar mahalliylashtirilib, Navoiy mashinasozlik zavodi hamda Zarafshon taʼmirlash-mexanika zavodida tayyorlandi. Misol uchun, 34-tegirmon bloki tarkibidagi baraban hajmi 80 kubometr bo‘lgan sharli tegirmonda soatiga 170-180 tonna maʼdan qayta ishlanmoqda. 35-tegirmon bloki esa ishlab chiqarish hajmini sezilarli darajada oshirishga xizmat qiluvchi yuqori unumdorlikka ega majmua hisoblanadi. Ushbu blokning maʼdan qayta ishlash bo‘yicha umumiy quvvati soatiga 300-320 tonnani tashkil etadi. Mazkur tegirmon bloklarining to‘liq ishga tushirilishi kelgusida korxonaning yillik maʼdan qayta ishlash quvvatini 58 mln. tonnadan oshirish imkonini beradi.

Taʼkidlash kerakki, Navoiy kon-metallurgiya kombinati korxonalarida joriy yilda 122 mln. tonnadan ortiq maʼdan qayta ishlash prognoz qilingan bo‘lsa, uning qariyb teng yarimi 2-gidrometallurgiya zavodi ulushiga to‘g‘ri keladi.

3,5 ming nafardan ortiq ishchi-xizmatchilar, muhandis-texnik xodimlar faoliyat olib borayotgan zavodda texnologik jarayonlarni to‘liq nazorat qilish imkonini beruvchi avtomatlashtirilgan boshqaruv tizimlari o‘rnatilgan. Bu ishlab chiqarishni muntazam kuzatib borish, tejamkorlikka erishish, ish surʼatini yanada oshirishni taʼminlamoqda.

“NKMK” AJ Matbuot xizmati