Navoiy kon-metallurgiya kombinatida yuk tashish, konlardan qazib olinayotgan tog‘ jinslarini gidrometallurgiya zavodlariga o‘z vaqtida yetkazishda zamonaviy avtotransport vositalaridan keng foydalaniladi.

Bu borada kombinatning eng yirik avtokorxonasi – Markaziy kon boshqarmasi tarkibidagi Avtomobil transporti boshqarmasining 2,5 ming nafardan ortiq jamoasi ishlab chiqarish jarayonlarining uzluksizligini taʼminlash hamda yuk tashish ishlarini samarali tashkil etishga munosib hissa qo‘shib kelmoqda.

Keyingi yillarda avtokorxonada og‘ir yuk tashuvchi avtoag‘dargichlar va konchilik texnikalari muntazam yangilanib borilmoqda. Buning hisobiga tog‘ jinslarini tashish hajmi yildan-yilga ortib borayapti. Jumladan, 2026-yilning birinchi yarim yilligida “Muruntov” konidan 96,2 mln. kubometr tog‘ jinslari tashilib, belgilangan rejalar ortig‘i bilan bajarildi. Ishlab chiqarish tannarxini kamaytirish va yoqilg‘i-moylash materiallaridan oqilona foydalanish maqsadida, 4 ming tonnadan ortiq dizel yoqilg‘isi iqtisod qilindi.

- Hozirgi vaqtda korxonamizda tog‘ jinslarini tashish jarayonida 180 dan ortiq og‘ir yuk tashuvchi avtoag‘dargichlar va 190 dan ziyod yo‘l-qurilish mashinalari hamda mexanizmlaridan keng foydalanilmoqda. Avtotransport parki asosan “Komatsu”, “Caterpillar”, “Hitachi” rusumli zamonaviy avtoag‘dargichlardan iborat, chunki ular har jihatdan qulay, unumdor va tejamkor. Bir sutka davomida o‘rtacha 4 mingdan ziyod qatnov amalga oshiriladi. Barcha qatnovlar oldindan belgilangan yo‘nalishlar asosida tashkil etilib, zamonaviy boshqaruv tizimi orqali muvofiqlashtiriladi. GPS monitoring tizimi transport vositalarining harakatini real vaqtda kuzatish, belgilangan yo‘nalishlarga rioya etilishini nazorat qilish hamda dispetcherlik boshqaruvini yana-da samarali tashkil etish imkonini bermoqda, - deydi Avtomobil transporti boshqarmasi boshlig‘i Shuhrat Mavlonov.

“Muruntov” konidagi avtotranspot vositalariga tezkor texnik xizmat ko‘rsatish hamda mayda nosozliklarni joyida bartaraf etish imkonini beruvchi servis xizmatlari yo‘lga qo‘yildi. Buning natijasida texnikalarni taʼmirlash uchun Avtomobil transporti boshqarmasi hududiga olib kelishga ehtiyoj kamayib, nosozliklar konda qisqa vaqt ichida bartaraf etilmoqda. Bu esa texnikalarning bekor turib qolish vaqtini qisqartirish, ishlab chiqarish jarayonlarining uzluksizligini taʼminlash va vaqtdan samarali foydalanishga xizmat qilmoqda.

Zamonaviy avtotransport vositalari, boshqaruv tizimlarining keng joriy etilishi yuk tashish samaradorligini yanada oshirish, texnikalardan unumli foydalanish hamda belgilangan vazifalarni o‘z vaqtida bajarishga xizmat qilmoqda.

“NKMK” AJ Matbuot xizmati