Joriy yilning 14-15-may kunlari Toshkent viloyati Ohangaron shahrida “Milliy sanoat zanjiri” sanoat ko‘rgazmasi o‘tkazilmoqda. Ko‘rgazmada tog‘-kon sanoati, metallurgiya, geologiya sohasiga oid yuqori texnologik mahsulotlar, sanoat startaplari, ilmiy ishlanmalar hamda istiqbolli loyihalar namoyish etilmoqda.

Mazkur ko‘rgazmaning asosiy maqsadi – mahalliy mahsulotlar ishlab chiqarishni kengaytirish, sanoat kooperatsiyasini rivojlantirish, xususiy sektor va yirik sanoat korxonalari o‘rtasida mustahkam hamkorlik zanjirini shakllantirish, tadbirkorlarni davlat xaridlariga keng jalb etish hamda import o‘rnini bosuvchi mahsulotlar ishlab chiqarishni qo‘llab-quvvatlashdan iborat.

Ushbu tadbirda “Navoiy kon-metallurgiya kombinati” AJ vakillari ham ishtirok etmoqda. Kombinat ko‘rgazma stendida korxona quvvatlarida ishlab chiqarilayotgan maʼdanni maydalash tegirmoni, quyiltirgich, gidrotsiklon, universal tokarlik dastgohi, avtomatlashtirish shkaflari, tegirmon vali, yanchish uskunasi plitasi hamda yanchish uskunasi konusli zirhi kabi 10 dan ortiq yuqori texnologik sanoat mahsulotlarining maketlari taqdim etilgan. Shuningdek, bugungi kunda kombinat tomonidan import qilinayotgan hamda mahalliy korxonalar uchun o‘zlashtirish tavsiya etilayotgan 100 dan ziyod import mahsulotlari namoyish etilmoqda.

Kombinat stendida yirik investitsion loyihalarida “mahalliy kontent” doirasida “Kelajak loyihalari” dasturi bo‘yicha ekspozitsiya namoyish etilmoqda. Mazkur ekspozitsiyada amalga oshirilayotgan investitsion loyihalarini yillar kesimida o‘zlashtirish, ishga tushirilgandan keyin ishlab chiqarish quvvatlarini bosqichma-bosqich to‘liq quvvatga chiqarish, loyiha doirasida mahalliy kontent ulushini ajratish (uskunalar, qurilish va xizmatlar), import qilinadigan texnologiyalar, uskunalar, materiallar va xomashyolar to‘g‘risida maʼlumotlar aks ettirilgan.

Ko‘rgazma davomida sanoat kooperatsiyasi doirasida mahalliy korxonalar bilan kombinat ehtiyojlari uchun sanoat mahsulotlari yetkazib berish bo‘yicha hamkorlik shartnomalari va kelishuv memorandumlarini imzolash, kombinat mutahassislari tomonidan “Kon-metallurgiya sohasida mahalliylashtirish va kooperatsiya aloqalarini rivojlantirishning ustuvor yo‘nalishlari mavzusida” taqdimot o‘tkazish rejalashtirilgan.

“NKMK” AJ Matbuot xizmati