Navoiy kon-metallurgiya kombinatining “G‘ujumsoy” koni Janubiy kon boshqarmasi tarkibidagi yirik yer osti konlaridan biridir. Kondan qazib olingan oltin tarkibli maʼdan avtotransport vositalari orqali 4-gidrometallurgiya zavodiga qayta ishlash uchun yetkazilmoqda.

“G‘ujumsoy” konida tog‘ jinslarini yer yuzasiga chiqarish, ishchi-xodimlar va asbob-uskunalarni shaxtaga olib tushish va olib chiqarish uchun ikkita tik va bitta qiya shaxta stvolidan foydalanilmoqda. Hozirgi vaqtda konchilik ishlarini bajarish jarayoniga 46 ta zamonaviy o‘ziyurar yer osti kon texnikasi jalb etilgan. Kon jamoasi tomonidan 2025-yilda 890 ming tonna maʼdan qazib olingan bo‘lsa, so‘nggi besh yilda bu ko‘rsatkich 4,2 mln. tonnani tashqil etdi.

2026-2030-yillarga mo‘ljallangan istiqbolli rejalarda konning maʼdan qazib olish quvvatini yanada oshirish hamda zaxiralarni chuqurroq o‘rganish vazifasi belgilangan. Bugungi kunda yer osti lahimlaridagi kon bosimini oldindan aniqlaydigan maxsus seysmik datchiklarni o‘rnatish loyihasi amalga oshirilmoqda.

Shuningdek, yaqinda “G‘ujumsoy” konida tog‘ jinslari qazib olingandan keyin hosil bo‘lgan yer osti bo‘shliqlarini sement qorishmasi bilan to‘ldirishga mo‘ljallangan texnologik majmua ishga tushirildi. Mazkur majmua tuproq va toshlar qulashining oldini olish, konchilar xavfsizligini taʼminlash hamda atrofdagi maʼdan bloklarini xavfsiz qazib olishga xizmat qiladi. Bugungi kunga kelib, konda uchta bu kabi qurilmadan foydalanilmoqda.

Ayni paytda qariyb 1,2 ming nafar ishchi-xodimdan iborat “G‘ujumsoy” koni jamoasi ishlab chiqarish rejalarini o‘z vaqtida bajarish bilan birga, maʼdan qazib olish hajmini oshirib borish kabi masʼuliyatli vazifalarni amalga oshirib kelmoqda.

“NKMK” AJ Matbuot xizmati