Bugungi kunda Navoiy kon-metallurgiya kombinatining mahalliylashtirilgan va import o‘rnini bosuvchi mahsulotlar ishlab chiqariladigan Navoiy mashinasozlik zavodi tarkibida Taxiatosh metall konstruksiyalar va nostandart jihozlar ishlab chiqarish zavodi faoliyat olib bormoqda. Korxonada o‘tgan davr mobaynida 16 ming tonnaga yaqin mahsulot ishlab chiqarildi.

Hozirgi vaqtda ushbu zavodda har xil turdagi metall konstruksiyalar, nostandart jihozlar ishlab chiqarish, metallarga ishlov berish, payvandlash va ruxlash kabi yo‘nalishlarda ishlar olib borilmoqda. 130 nafar ishchi-xodimdan iborat zavod jamoasi nafaqat Navoiy kon-metallurgiya kombinati, balki Qoraqalpog‘istondagi energetika, sanoat va qurilish sohalari korxonalari, tadbirkorlik subyektlariga ham xizmat ko‘rsatmoqda.

- Mamlakatimizda qurilish va bunyodkorlik ishlari ko‘lami kengayib borayotganligi sababli, korxonamizda ishlab chiqarilayotgan mahsulotlarga talab borgan sari oshmoqda. Jumladan, tez yig‘iladigan, hajm jihatdan yengil bo‘lgan metall konstruksiyalar va karkaslar ancha xaridorgir. So‘nggi yillarda zavodimizni kengaytirish, mahsulot turlarini ko‘paytirish, ishlab chiqarish surʼatini oshirish yo‘lida keng ko‘lamli ishlar olib borildi. Metallarni zangdan himoya qilishga mo‘ljallangan ruxlash uchastkasi, konveyerlar uchun roliklar ishlab chiqarishga ixtisoslashgan bo‘linma ishga tushirilishi korxona imkoniyatlarini yanada kengaytirdi, - deydi zavod direktori Abdusalom Amonov.

Zavod jamoasining saʼy-harakatlari bilan konveyer liniyalari uchun metall konstruksiyalar, mexanika uchastkasida turli kattalikdagi nasoslarning ehtiyot qismlariga ishlov berish va sayqallash hamda boshqa mahsulot turlarini ishlab chiqarish yo‘lga qo‘yildi. Xususan, NKMK tomonidan Nurota tumanida barpo etilgan 6-gidrometallurgiya zavodi qurilishi davomida mazkur korxonada ishlab chiqarilgan metall konstruksiyalar, nostandart jihozlar, ehtiyot qismlar o‘z vaqtida yetkazildi.

Joriy yilda korxona jamoasi tomonidan 4 ming tonnadan ortiq mahsulotlar ishlab chiqarish rejalashtirilgan. Belgilangan rejalarni o‘z vaqtida, sifatli bajarish uchun imkoniyatlar yetarli.

“NKMK” AJ Matbuot xizmati