Navoiy kon-metallurgiya kombinati vakillari Chexiya Respublikasining Praga shahridagi Yevropa amaliy fanlar va menejment instituti (European Institute of Applied Science and Management) da o‘tkazilayotgan “Gender tenglik va inklyuzivlikda Yevropa yondashuvi” mavzusidagi xalqaro o‘quv seminarida qatnashmoqda.

O‘zbekiston Respublikasi Tog‘-kon sanoati va geologiya vazirligi tashabbusi bilan tashkil etilgan mazkur o‘quv seminarda vazirlik, “NKMK” AJ, “OKMK” AJ va tijorat banklari vakillari ishtirok etishmoqda.

Seminar doirasida ishtirokchilar gender tenglikni taʼminlash, inklyuziv korporativ madaniyatni shakllantirish, xodimlarning kasbiy rivojlanishi uchun teng imkoniyatlar yaratish, inklyuzivlik tamoyillarini hisobga olgan holda kadrlar siyosatini takomillashtirish bo‘yicha Yevropaning ilg‘or amaliyotlari va zamonaviy yondashuvlari bilan tanishmoqda. Gender tenglikni ilgari surish, xotin-qizlarning yetakchilik salohiyatini rivojlantirish va barcha toifadagi xodimlar uchun qulay ish muhitini yaratish bo‘yicha davlat va korporativ dasturlarni amalga oshirishda Yevropaning turli mamlakatlari tajribasiga alohida eʼtibor qaratilmoqda.

O‘quv seminarida o‘rganilgan tajriba va olingan ko‘nikmalar tashkilotlar faoliyatiga zamonaviy xalqaro yondashuvlarni joriy etish, inson resurslarini boshqarish samaradorligini oshirish hamda gender tenglik, o‘zaro hurmat va inklyuzivlik tamoyillariga asoslangan korporativ madaniyatni rivojlantirishga xizmat qiladi.

“NKMK” AJ Matbuot xizmati