Navoiy kon-metallurgiya kombinatining 2040-yilgacha bo‘lgan davrda va uzoqroq istiqbolda suvdan samarali foydalanish strategiyasini amalga oshirish doirasida Navoiy davlat konchilik va texnologiyalar universitetida kombinat xodimlari uchun “Suvdan oqilona foydalanishga qaratilgan strategik fikrlash” mavzusida korporativ treninglar tashkil etildi.

Yil davomida o‘tkaziladigan treninglarda kombinat bo‘linmalarida energetika sohasida ishlaydigan muhandis-texnik xodimlar ishtirok etshi rejalashtirilgan. Treninglarni o‘tkazishdan maqsad kombinat xodimlarining strategik tahlil qilish, boshqaruv qarorlarini qabul qilish va ishlab chiqarish jarayonlarida suv resurslaridan oqilona foydalanishga innovatsion yondashuvni joriy etish bo‘yicha malakasini oshirish hamda sohada samarali ishlash uchun zarur bo‘lgan amaliy ko‘nikmalarni egallashdan iboratdir.

- Universitetning “Mintaqaviy va korporativ strategiyalar” kafedrasi o‘qituvchilari tomonidan o‘tkazilayotgan treningda birinchi marotaba qatnashayapman. Trening davomida bizlarga ish jarayonida qaror qabul qilishning oqibatlarini oldindan ko‘ra bilish uchun strategik fikrlashni rivojlantirish, suv resurslarini boshqarish jarayonidagi yo‘qotishlarni kamaytirish, faoliyatimizda sunʼiy intellekt imkoniyatlaridan foydalanish to‘g‘risida qiziqarli maʼlumotlar taqdim etilmoqda. Shu bilan birga, suvdan oqilona foydalanishda ilg‘or jahon tajribasi o‘rgatilmoqda, - deydi Markaziy kon boshqarmasi Tashqi suv taʼminoti birlashgan energiya xizmati sex boshlig‘i o‘rinbosari A.Rahimov.

NKMKda ishlab chiqarish jarayonlarida suvdan oqilona foydalanish ustuvor vazifa hisoblanadi. Korxonada bu yo‘nalishdagi ishlarni taʼminlash, kombinatning ekologik va texnologik barqarorligini oshirish, “yashil iqtisodiyot” bilan bog‘liq innovatsion yechimlar va strategik yondashuvlarni joriy etish bo‘yicha Moskva davlat universiteti bilan hamkorlikda kombinatining 2040-yilgacha bo‘lgan davrda va uzoqroq istiqbolda suvdan samarali foydalanish strategiyasi ishlab chiqildi va bosqichma-bosqich amalga oshirilmoqda.

Mazkur strategiyada zamonaviy ekologik, iqtisodiy va ijtimoiy talablarga javob beradigan suvdan oqilona foydalanishning uzoq muddatli dasturini shakllantirish imkonini beruvchi ilmiy strategik tahlil, tizimli yondashuv va vazifalarning kompleks ko‘rinishi taqdim etilgan. Strategiyada belgilangan maqsad va vazifalarni amalga oshirishda kombinat xodimlarining masʼuliyati, strategik fikrlash bo‘yicha amaliy ko‘nikmalarini oshirish muhim ahamiyatga ega.

“NKMK” AJ Matbuot xizmati