“Navoiy kon-metallurgiya kombinati” AJ vakillari Birlashgan Millatlar Tashkilotining Xotin-qizlar tashkiloti (UN Women) hamda BMT Global kelishuvining Markaziy Osiyo tarmog‘i (Global Compact Network Central Asia) tomonidan tashkil etilgan amaliy onlayn seminarda ishtirok etishdi.

Mazkur tadbirda ishtirok etish kompaniyaning BMT Global kelishuviga qo‘shilishi doirasida amalga oshirilayotgan ishlarining bir qismi bo‘lib, xalqaro taʼlim dasturlari, ekspertlar tajribasi hamda barqaror rivojlanish sohasidagi xalqaror hamkorlar tarmog‘idan foydalanish imkoniyatini yaratadi.

Amaliy onlayn seminar Markaziy Osiyo mamlakatlarida, shu jumladan O‘zbekiston Respublikasida gender tenglik va mehnat munosabatlarini huquqiy tartibga solish masalalariga bag‘ishlandi. Tadbir davomida ishtirokchilar milliy qonunchilikning o‘ziga xos jihatlari, teng imkoniyatlarni taʼminlash bo‘yicha xalqaro yondashuvlar, shuningdek, inklyuziv ish muhitini yaratish bilan bog‘liq amaliy misollarni ko‘rib chiqishdi. Seminar ochiq muloqot shaklida o‘tkazilib, amaliy misollar tahlil qilindi hamda ishtirokchilarning savollariga ekspertlar tomonidan atroflicha javoblar berildi.

“NKMK” AJ BMT Global kelishuvi tamoyillariga amal qilib, inson huquqlariga rioya qilish, teng imkoniyatlarni taʼminlash, barqaror rivojlanish bo‘yicha xalqaro standartlarga muvofiq zamonaviy korporativ madaniyatni shakllantirish sohasidagi korporativ amaliyotlarni izchil rivojlantirib bormoqda.

Taʼkidlash joizki, 2025-yilda kompaniya BMTning barqaror rivojlanish sohasidagi eng yirik xalqaro tashabbusi – Global kelishuviga qo‘shilgan edi.

“NKMK” AJ Matbuot xizmati