Ishlab chiqarishlarda mehnat muhofazasi va xavfsizlik texnikasini taʼminlash ko‘p jihatdan ish beruvchining saʼy-harakati, shuningdek, shu masalaga masʼul xodimlar bilimi, malakasiga bog‘liq. Navoiy kon-metallurgiya kombinatida bunga alohida eʼtibor qaratilgan. Korxona maʼmuriyati va kasaba uyushmasi Kengashi hamkorlikda ushbu yo‘nalishda kadrlarni o‘qitish, qayta tayyorlash va malakasini oshirishni bosqichma-bosqich amalga oshirib kelayapti.

Kombinat tomonidan ayni paytda 49 nafar ishchi-xodim sirtqi taʼlim asosida O‘zbekiston kasaba uyushmalari Federatsiyasi huzuridagi Mehnat va ijtimoiy munosabatlar akademiyasi (ATSO)da mehnat muhofazasi va texnik xavfsizlik mutaxassisligi bo‘yicha o‘qitilayotgani ana shunday xayrli tashabbuslardan biridir.

Kombinat boshqarmasi majlislar zalida “NKMK” AJ bosh muhandisi A.Ravshanov va NKMK xodimlari kasaba uyushmasi Kengashi raisi I.Rahmatovlar ishtirokida mazkur akademiyada tahsil olayotgan ishchi-xodimlar bilan uchrashuv bo‘lib o‘tdi.

Uchrashuvdan maqsad mehnat muhofazasi va xavfsizlikni taʼminlash borasida oldinda turgan ustuvor vazifalar, ish joylarida mehnat muhofazasiga qatʼiy amal qilish, ishlab chiqarishda xavflarning oldini olish, akademiyada tahsil olayotgan xodimlar tomonidan amaliyot va ishlab chiqarishni integratsiyalash hamda bilim va ko‘nikmalarni faoliyatga tadbiq etish, sohaga raqamlashtirish va sunʼiy intellektni joriy etish borasida amalga oshirilayotgan ishlar va kelgusidagi vazifalar yuzasidan fikr almashishdan iborat bo‘ldi.

- Biz, mehnat va ijtimoiy munosabatlar sohasida yuqori malakali kadrlar tayyorlaydigan ushbu taʼlim muassasasida nafaqat bilimimizni oshirayapmiz, balki hozirgi davr talabiga mos mehnat muhofazasi va xavfsizlik texnikasi bo‘yicha o‘qiyapmiz. Albatta, olgan ko‘nikmalarimizni faoliyatga tadbiq etib, ishlab chiqarishlarda xavfsizlik qoidalarini yanada kuchaytirish, baxtsiz hodisalarning oldini olish, xodimlarning hayoti va salomatligini muhofaza qilishga yo‘naltiramiz, - deydi Ishlab chiqarishni avtomatlashtirish boshqarmasi xodimi Sh.Egamberdiyev.

Uchrashuvda bo‘lajak soha mutaxassislarining taklif-mulohazalari tinglandi. Jumladan, ishlab chiqarish jarayonlarida mehnat muhofazasi va xavfsizlik texnikasiga amal qilishni tashkil etish, mavjud muammolar va ularning yechimlari yuzasidan o‘zaro fikr almashildi.

Muloqot yakunida bundan buyon mehnat muhofazasi bo‘yicha malakali mutaxassislarni tayyorlash va ishlab chiqarishda xavfsiz mehnat sharoitlarini taʼminlash hamda amalga oshirish borasidagi hamkorlikni davom ettirish muhimligi ko‘rsatib o‘tildi.

“NKMK” AJ Matbuot xizmati.