Oldin xabar berganimizdek, 14-17-sentabr kunlari Toshkent shahrida O‘zbekiston Respublikasi Tog‘-kon sanoati va geologiya vazirligi hamda Xalqaro geofiziklar jamiyati (Society of Exploration Geophysicists – SEG) tomonidan tashkil etilgan geologiya, tog‘-kon sanoati va mineral resurslar sohasidagi “GEOMIN 2026” xalqaro anjumani o‘tkazilmoqda. Anjumanda “Navoiy kon-metallurgiya kombinati” AJ vakillari ham ishtirok etmoqda.

Xalqaro anjuman doirasida Axborot-kommunikatsiya texnologiyalari boshqarmasi boshlig‘i o‘rinbosari Maksim Hasanov tomonidan sunʼiy intellekt texnologiyalarini joriy etish mavzusida maʼruza qilindi hamda ishlab chiqarish va boshqaruv jarayonlarida SI-yechimlarini qo‘llash bo‘yicha kombinatning amaliy tajribasi taqdim etildi.

Maʼruzada taʼkidlanganidek, kombinatda geologiya, kon ishlari, qayta ishlash va metallurgiya jarayonlari, sanoat xavfsizligi, texnik xizmat ko‘rsatish va taʼmirlash, yoqilg‘i-moylash materiallari, korporativ jarayonlar, moddiy resurslarga bo‘lgan ehtiyojni prognozlashtirish, xaridlar va shartnomaviy xavf-xatarlarni tahlil qilish, xodimlarni boshqarish kabi qariyb 30 ta yo‘nalishda SI-yechimlarini qo‘llash bo‘yicha ishlar olib borilmoqda.

“GEOMIN 2026” xalqaro anjumanida taqdim etilgan yechimlar “NKMK” AJ da sunʼiy intellekt texnologiyalaridan prognozlash, ishlab chiqarish jarayonlarini optimallashtirish va boshqaruv qarorlarini qabul qilishni qo‘llab-quvvatlashda yanada kengroq foydalanishga alohida eʼtibor qaratilayotganini aks ettiradi.

“NKMK” AJ Matbuot xizmati