Navoiy kon-metallurgiya kombinatida maʼdan qazib olish va qayta ishlash, qimmatbaho metallar ishlab chiqarish hajmlarini oshirishda “Muruntov” oltin konini o‘zlashtirish bo‘yicha amalga oshirilayotgan investitsion loyiha muhim ahamiyatga ega. Konni o‘zlashtirishning V navbati II bosqichi investitsiya loyihasi kombinatning uzoq muddatli rivojlanish strategiyasida alohida o‘rin tutadi.

Bugungi kunda “Muruntov” konining uzunligi 6 kilometr, kengligi 4 kilometr, chuqurligi 750 metrdan ortiq. Bu yerda qo‘llanilayotgan kon-geologik va kon-texnik yechimlar kelajakda kon chuqurligini 1 000 metrgacha yetkazish imkonini beradi.

“Muruntov” koni boshlig‘i Nuriddin Kamolov mazkur investitsiya loyihasi bo‘yicha olib borilayotgan va bajarilishi rejalashtirilgan ishlar to‘g‘risida quyidagilarni maʼlum qildi:

- Ushbu loyiha bo‘yicha geologiya-qidiruv ishlarini davom ettirish, xomashyo bazasini kengaytirish va yangi zaxiralarni aniqlash, konchilik ishlarining texnik va texnologik darajasini yanada oshirish uchun yuqori unumdorlikka ega bo‘lgan burg‘ilash uskunalari, gidravlik va elektr tokida ishlaydigan ekskavatorlar, og‘ir yuk tashuvchi avtoag‘dargichlar kabi zamonaviy konchilik texnikalarni keltirish, tog‘ jinslarini tashish tizimini modernizatsiya qilish rejalashtirilgan.

Bugungi kunda konda qazib olish va tashish jarayonlarini optimallashtirish maqsadida 5 va 6-konveyer liniyalarini qurish ishlari olib borilmoqda. Kon transportlarini o‘z vaqtida taʼmirlash uchun qator sexlar rekonstruksiya qilinmoqda. Hozirgi vaqtda konda sutkasiga 550 ming kubometr tog‘ jinslarini qazib olish rejasi to‘liq bajarilmoqda.

Mazkur loyiha nafaqat ishlab chiqarish ko‘rsatkichlarini oshirish, balki hududning ijtimoiy-iqtisodiy rivojlanishiga ham sezilarli hissa qo‘shadi. Uni amalga oshirish natijasida yuzlab yangi ish o‘rinlari yaratiladi. Ayni paytda ishlab chiqarish jarayonlarini malakali kadrlar bilan taʼminlashga alohida eʼtibor qaratilmoqda. Xususan, uyumlovchi mashina mashinisti, konveyer mashinisti, boshqaruv pulti operatori, jihozlarni taʼmirlash bo‘yicha elektr chilangar hamda elektrogazpayvandchi kabi mutaxassislarga talab yuqori.

“Muruntov” konining uzoq muddatli barqaror faoliyatini taʼminlash borasida olib borilayotgan ishlar Navoiy kon-metallurgiya kombinatining jahondagi yetakchi oltin ishlab chiqaruvchi kompaniyalardan biri sifatidagi mavqeini yanada mustahkamlash hamda mamlakatimiz iqtisodiyotining barqaror o‘sishiga munosib hissa qo‘shishga xizmat qiladi.

“NKMK” AJ Matbuot xizmati