14-17-sentabr kunlari Toshkent shahrida O‘zbekiston Respublikasi Tog‘-kon sanoati va geologiya vazirligi hamda Xalqaro geofiziklar jamiyati (Society of Exploration Geophysicists – SEG) tomonidan tashkil etilgan geologiya, tog‘-kon sanoati va mineral resurslar sohasidagi “GEOMIN 2026” xalqaro anjumani o‘tkazilmoqda.

Mazkur anjumanning asosiy mavzusi – “Sun’iy intellekt va raqamli transformatsiya orqali geologiya-qidiruv ishlarini rivojlantirish”. Dunyoning 26 mamlakatidan 70 dan ortiq tashkilot vakillari ishtirok etayotgan xalqaro anjumanda 100 dan ortiq taqdimot, 25 ta texnik sessiya va yuqori darajadagi uchta panel muhokamasi o‘tkazilishi rejalashtirilgan. Anjumanda “Navoiy kon-metallurgiya kombinati” AJ vakillari ham qatnashmoqda.

Tadbir doirasida foydali qazilmalarni izlash va qidirishning yangi yondashuvlari, texnologiyalarni rivojlantirish, professional tajriba almashish, davlat tuzilmalari, geologiya xizmatlari, sanoat korxonalari va kompaniyalar o‘rtasidagi hamkorlikni kengaytirish masalalari muhokama qilinmoqda.

Kritik va strategik minerallar, geologiya-qidiruv ishlarida sun’iy intellekt, ma’lumotlarni tahlil qilishning zamonaviy usullari va raqamli platformalarni qo‘llash, geofizik tadqiqotlar va geologik modellashtirishni rivojlantirish hamda istiqbolli mineral resurs hududlarining investitsiyaviy jozibadorligini oshirishga alohida e’tibor qaratilmoqda.

Anjumanning yo‘nalishlaridan biri tabiiy resurslardan barqaror foydalanish, ekologik va ijtimoiy mas’uliyat, ESG tamoyillarini joriy etish hamda konchilik faoliyatini mas’uliyatli tashkil etishning zamonaviy yondashuvlariga bag‘ishlangan.

“GEOMIN 2026” anjumanning O‘zbekistonda o‘tkazilishi ushbu xalqaro platformani ilk bor Markaziy Osiyoga olib chiqmoqda hamda mamlakatimizning geologik salohiyati, kritik va strategik mineral resurslarni rivojlantirish istiqbollari, xalqaro texnologik va investitsiyaviy hamkorlik uchun yangi imkoniyatlarni namoyish etishga xizmat qiladi.

“NKMK” AJ Matbuot xizmati