Ayni kunlarda Toshkent shahrida “ICTWeek Uzbekistan 2026” axborot-kommunikatsiya texnologiyalari haftaligi o‘tkazilmoqda. Mazkur haftalik doirasida “Navoiy kon-metallurgiya kombinati” AJ vakillari sanoatda raqamli transformatsiya, sunʼiy intellektni joriy etish va zamonaviy texnologiyalardan foydalanish masalalariga bag‘ishlangan panel sessiyasida faol ishtirok etishdi.

Panel sessiyasida Axborot-kommunikatsiya texnologiyalari boshqarmasi boshlig‘i o‘rinbosari M.Hasanov tomonidan sunʼiy intellekt texnologiyalarini keng joriy etish mavzusida maʼruza qilindi hamda raqamli transformatsiya, ishlab chiqarish jarayonlari samaradorligini oshirishga qaratilgan SI-texnologiyalari va raqamli yechimlarni joriy etish borasidagi kombinatning tajribasi taqdim etildi.

Tadbir yakunida “Navoiy kon-metallurgiya kombinati” AJ “Raqamli rivojlanishda eng yuqori natija ko‘rsatgan sanoat korxonasi” nominatsiyasida eʼtirof etildi. Tadbirda Axborot texnologiyalari va raqamlashtirish bo‘yicha direktor B.Davlatov ishtirok etib, ushbu nominatsiya bo‘yicha mukofotni qabul qildi.

Bu kabi eʼtirof kombinat tomonidan ishlab chiqarishni raqamlashtirish, sunʼiy intellekt texnologiyalarini keng joriy etish va zamonaviy raqamli yechimlarni rivojlantirish bo‘yicha izchil amalga oshirilayotgan ishlar natijasini aks ettiradi.

“NKMK” AJ Matbuot xizmati