Sizlarni va sizlar orqali barcha dilbar ayollarimiz, opa-singillarimiz va mehnat faxriylarini 8 mart – Xotin-qizlar bayrami bilan chin qalbdan muborakbod etamiz.
Siz, mo‘’tabar ayollarga qalbimizdagi eng samimiy tilaklarimizni izhor etish bizga hamisha cheksiz quvonch bag‘ishlaydi.
Zero, mo‘’tabar Ayol, deganda, eng avvalo, ko‘z oldimizga nazokat va sadoqat timsoli bo‘lgan tabarruk momolarimiz, mehribon onajonlarimiz va dilbar opa-singillarimiz keladi.
Barchamizni dunyoga keltirib, bizga butun mehrini bag‘ishlagan, siz zahmatkash ayollarimizning farzandlar kamolidagi xizmatlaringiz beqiyos. Buni, hech qanday boylik bilan o‘lchab bo‘lmaydi.
Bugun muhtaram Yurtboshimiz Shavkat Miromonovich Mirziyoyev rahnamoligida xotin-qizlarimizning jamiyatdagi roli, obro‘sini oshirish yo‘lida olib borayotgan siyosati yuksak shon-sharafga loyiqdir.
Davlatimiz Rahbarining Oliy Majlisga yo‘llagan Murojaatnomasida ham xotin-qizlarimiz faolligini yangi bosqichga ko‘tarish g‘oyasi olg‘a surilganida ham sizlarga bo‘lgan e’tibor mujassam.
Yana shuni alohida ta’kidlash kerakki, har qanday zahmatli mehnat rag‘batga munosib. Shu nuqtai nazardan ayollarimiz mehnati doimiy davlatimizning yuksak mukofotlari bilan taqdirlanib kelinayapti.
Jumladan, 16 nafar ayollarimiz O‘zbekiston Qahramoni unvoni, minglab xotin-qizlarimiz turli orden-medallar bilan taqdirlangani, ular safida kombinatning 30 nafardan ortiq xotin-qizlari ham borligi bizni hamisha quvontiradi.
Bundan tashqari, iqtidorli qizlarimiz Zulfiya nomidagi Davlat mukofoti, faol ayollarimiz esa “Mo‘’tabar ayol” ko‘krak nishoni bilan taqdirlanayotgani yangi O‘zbekiston hayotida sizlarga bo‘lgan e’tibor borgan sari oshib borayotganidan dalolat beradi.
Eng quvonarlisi, O‘zbekiston tarixida ilk bor ayol kishi Yuqori Palata raisligiga, saylovlarda esa 24 nafari Senat a’zoligi, 48 nafari esa Qonunchilik palatasi, yuzlab ayollar mahalliy Kengash deputatligiga saylangani, shuningdek, ko‘plab xotin-qizlarimiz mas’ul rahbarlik lavozimlari, jumladan, tuman-shahar hokimi etib tayinlanayotgani yurtimizda ochiqlik siyosati, gender tengligi izchil ta’minlanayotganini ko‘rsatadi.
Ayniqsa, keyingi to‘rt yilda onalik va bolalikni muhofaza etish, ijtimoiy himoya qilish, yashash sharoiti og‘ir xotin-qizlarni arzon uy-joylar bilan ta’minlash, hayotdan rozi qilish yo‘lidagi oqilona siyosatimizning amaldagi namunasidir.
Aziz hamkasblar!
Bugun jonajon kombinatimizda 14 ming nafardan ortiq xotin-qizlar, 600 nafardan ziyod rahbar ayollar fidokorona mehnat qilib kelayapti.
Uzoq yillar kon-metallurgiya sohasida ishlab, kombinat ravnaqiga mehnati singan va ayni paytda yaqinlar ardog‘ida keksalik gashtini surayotgan faxriylarimiz bilan hamisha faxrlanamiz.
Bugungi shodiyonali kunda Dilorom Bahronova, Dilbar Saidova, Maya Tsoy, Feruza Musayeva, Tamara Demura, Lada Lagoda, Yelena Tsoy, Janna Novikova, Sanam Abdullayeva, Olga Vasilyonok, Lola Boboqulova, Natalya Alfyorova, Sabohat Yuldasheva, Hafiza Amirullayeva, Alfiya Zaripova singari turli kasb egalari mehnatini yuksak e’tirof etishni ham farz, ham qarz, deb bilaman. Albatta, bunday soha ilg‘orlari nomini yana ko‘p davom ettirish mumkin. Bugun ularning izdoshi salohiyatli yoshlar yetishib kelayotgani bizni quvontiradi, albatta.
Bepoyon Qizilqum sahrosida chinakkam matonat ko‘rsatayotgan turli kasb egalarining beqiyos mehnati doimiy “NKMK faxriysi” unvoni, “Konchilik shuhrati” ko‘krak nishoni bilan taqdirlanib kelinayapti.
Kombinat tomonidan xotin-qizlarimizni ijtimoiy himoya qilish doimiy diqqat-markazimizda bo‘lib, barcha ijtimoiy ob’yektlar, dam olish maskanlari ishchi-xodimlar va oilasi ixtiyoriga xizmat qilmoqda. Bundan buyon ham bunday xayrli ishlarimiz bardavom bo‘ladi. Kombinatimiz xotin-qizlari va ular oilasi baxtli hayot kechirsalar, bu – bizning baxtimizdir!
Aziz opa-singillar!
Bizning tilak va maqsadimiz bitta – oilangiz, farzandlaringiz, kombinatimiz jamoasi baxtiga hamisha omon bo‘ling!
Yana bir bor sizlarni betakror bayramlaringiz bilan samimiy tabriklab, sizlarga mustahkam sog‘lik, oilaviy baxt, xonadonlaringizga farovonlik, ishlaringizga omad tilaymiz.
Milliy tiklanishdan – milliy yuksalish sari dadil ildamlab borayotgan yurtimizda qadringiz yanada yuksalib boraversin, aziz ayollar!