Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Matbuot XALQONA OHANGLARDA ORZU-UMIDLAR MUJASSAM

XALQONA OHANGLARDA ORZU-UMIDLAR MUJASSAM

Mustaqillik bebaho ne’mat ekanligi haqida so‘z ketsa, biz avvalo azaliy qadriyatlarimiz, ming yillik urf-odatlarimiz qayta tiklanayotganligi, xalqimizning o‘lmas merosi sifatida ma’naviy xazinasini boyitayotganligini faxr-iftixor tuyg‘ulariga to‘lib-toshib gapiramiz va bundan ko‘nglimiz tog‘ qadar yuksaladi. Bu fikrlar, hech shubhasiz, xalq og‘zaki ijodi, folklor san’atiga to‘la daxldordir. Zero, folklor millat va elatlarning tarixi, qadimiy turmush tarzi, an’analari, orzu-umidlarining dostonu termalar, qo‘shig‘u laparlarda aks etgan yorqin namunasidir.

O‘zbek xalqi boy va rang-barang folklor merosiga ega. Xalq og‘zaki ijodi ona allasi, baxshilar termasi, mavsum qo‘shiqlari bo‘lib, bolalik davrimizdanoq qon-qonimizga singib ketgan, bu ohanglar yuraklarimizga juda yaqin. Ma’lumki, Amudaryo va Sirdaryo oralig‘idagi hudud qadimdan xalqlarning buyuk ko‘chishlari hamda turli siyosiy, madaniy, iqtisodiy munosabatlarida o‘ziga xos chorraha vazifasini o‘tagan. Bu jihatdan Buyuk ipak yo‘lining mazkur hududni to‘liq kesib o‘tganligini eslash kifoya. Qaysi yerdan savdo yo‘llari o‘tsa, o‘sha joyda siyosiy va madaniy yuksalish sodir bo‘lishi tabiiy. Demakki, azaldan o‘zbek xalq og‘zaki ijodining rivojlanganligi bejizga emas. Bugun ozod va obod yurtimizda folklor xalq san’atini qadr-qimmati, teran mazmunini yo‘qotmagan holda zamonaviylik ruhida, yangicha uslubda qayta ishlash, boyitish, keng xalq ommasiga yetkazish, dunyoga tanitish, eng muhimi, yosh avlod ongiga singdirishga alohida e’tibor berilmoqda. Ana shu ezgu maqsad yo‘lida turli tanlovlar o‘tkazilayapti. Tarbiyaviy ahamiyatga ega bunday tadbirlar, ayniqsa, bahor va go‘zallik ayyomi – Navro‘zi olam kunlarida yanada keng ko‘lam kasb etadi.

Navoiy kon-metallurgiya kombinati madaniyat muassasalari ishini zamon talabi darajasida tashkil etish, ulkan korxona tasarrufidagi shahar va qo‘rg‘onlarda istiqomat qilayotgan iqtidorli yoshlarni topish, ularning iste’dodlarini ro‘yobga chiqarishlariga ko‘maklashish kombinat ma’muriyati hamda kasaba uyushmalari Kengashi rahbariyatining doimiy diqqat markazida bo‘lib kelayapti. Qator yillardan buyon san’atning turli yo‘nalishlari bo‘yicha o‘tkazilayotgan an’anaviy “Qizilqum san’at g‘unchalari”, “Qizilqum ohanglari”, “Qizilqum ovozi”, “Romansiada” tanlovlari allaqachon o‘z shinavandalarini topib, xalq qalbidan joy oldi. Kombinat bosh direktori Q.Sanaqulovning g‘oyasi bilan bu tanlovlar yana bittaga oshdi. Mart oyining dastlabki kunlarida “Farhod” madaniyat saroyida I-“Qizilqum oltin merosi-2019” folklor-etnografik yo‘nalishidagi tanlov o‘tkazildi. Tanlovda Zarafshon shahridagi “Oltin vodiy” madaniyat uyining “Dilnavo”, Uchquduq shahri “Uchquduq” madaniyat uyining “Sahro”, Nurobod shahar “Nurobod” madaniyat uyining “Kamalak”, Zafarobod ko‘rg‘oni sport va madaniyat markazining “Shodlik”, “Zarmitan” koni “Konchi” madaniyat uyining “Charmitan”, “Do‘stlik” agrofirmasi “Navro‘z” madaniyat klubining “Do‘stlik” folklor jamoalari qatnashdilar. Tanlovda ikki yuz nafardan ortiq kishi ishtirok etib, ular safida yosh o‘g‘il-qizlardan boshlab, yoshi ulug‘ otaxonu onaxonlargacha borligi jamoalarning repertuari kengayib, mahorati oshib borishi, xalq og‘zaki ijodini targ‘ib qilish borasidagi xayrli ishlar bardavomligidan dalolat berib turibdi.

Shuni alohida ta’kidlash kerakki, tanlovni azim poytaxtimiz – Toshkent shahridan taklif etilgan hamda sohaning yetuk bilimdonlari bo‘lgan taniqli olimu san’atkorlar – folk¬lorshunos olim, filologiya fanlari doktori, professor, O‘zbekiston Respub¬likasida xizmat ko‘rsatgan madaniyat xodimi Mamatqul Jo‘rayev raisligida Respublika xalq ijodiyoti va madaniy-ma’rifiy ishlar ilmiy markazi direktori, professor Azamat Haydarov, O‘zbekiston Respub¬likasida xizmat ko‘rsatgan artist, Qoraqalpog‘iston Respublikasi xalq artisti Gulshad Atabayeva, O‘zbekiston Respublikasida xizmat ko‘rsatgan artist Toshpo‘lat Matkarimov, O‘zbekiston Respublikasida xizmat ko‘rsatgan madaniyat xodimi, “O‘zbekiston” telekanali bosh rejissyori Alisher Madraximovlardan iborat hakamlar hay’ati boshqarib bordi.

NKMK kasaba uyushmalari Kengashi raisi I.Rahmatov I-“Qizilqum oltin merosi-2019” tanlovini tabrik so‘zi bilan ochib, tanlovdan kuzatilgan maqsadni alohida ta’kidlab, ijodiy  jamoalarga omadlar tiladi. Ikki turdan iborat tanlovning birinchi turida ishtirokchilar o‘z hududlaridagi urf-odatlar va qadriyatlarni teatrlashtirilgan tarzda namoyish etdilar. “Sahro” ansamblining “Betashar”, “Shodlik” ansamblining “Bozor”, “Kamalak” ansamblining “Mayda to‘y”, “Do‘stlik” ansamblining “Sandali ta’rifi”, “Dilnavo” ansamblining “Navro‘z sayli”, “Charmitan” ansamb¬lining “Yil boshi” deb nomlangan chiqishlarini tomoshabinlar qiziqish bilan kutib oldilar. Bu chiqishlar zalda to‘planganlarda nafaqat o‘zbek, balki qardosh qozoq xalqining o‘ziga xos urf-odatlari, chorvadorlarning bahorgi tashvishlari, Navro‘z sayillarida ijro etiladigan xalq laparlari, turli o‘yinlar haqidagi tasavvurlarini boyitdi. Ayniqsa, “Dilnavo” ansambli ishtirokchilarining o‘zbek, rus, qozoq, ozarbayjon tillarida yangragan qo‘shiqlari tinglovchilarda zavq-shavq uyg‘otdi.

Tanlovning ikkinchi turida “Sahro” ansambli “Sahro navolari”, “Shodlik” ansambli “Sahro”, “Kamalak” ansambli “Xalq termalari”, “Do‘stlik” ansambli “Kombinatda bugun to‘y”, “Dilnavo” ansambli “Zarmakonim”, “Charmitan” ansambli “Qo‘shrabot laparlari” nomli teatrlashtirilgan chiqishlarida xalqona ohang va laparlar orqali Navoiy kon-metallurgiya kombinatining oltmish yillik yubileyini, jamoa amalga oshirgan va oshirayotgan bunyodkorlik ishlarini, bugungi farovon hayotlaridan rozi va shukronaliklarini tarannum etdilar.

Folklor etnografik yo‘nalishdagi muhim tadbirning ikkinchi kuni tanlov ishtirokchilarini taqdirlash ma¬rosimi o‘tkazildi. Barcha qatnashchilar tomoshabinlarning olqishlari ostida “Farhod” madaniyat saroyining sahnasiga ko‘tarildilar. Tantanali tarzda tanlov yakunlari e’lon qilindi. “Charmitan” va “Do‘stlik” jamoalari uchinchi, “Sahro” va “Kamalak” jamoalari ikkinchi, “Shodlik” jamoasi birinchi o‘rinni egalladi. “Dilnavo” folklor jamoasi tanlovning Gran-pri sohibi bo‘ldi. G‘oliblarga tegishli darajali diplomlar va qimmatbaho sovg‘alar topshirildi. “Farhod” madaniyat saroyining “Sardoba” jamoasi o‘zbek folklorini xalqaro miqyosda targ‘ib etishdagi faol ishtiroki uchun rag‘batlantiruvchi mukofot bilan taqdirlandi. Shundan so‘ng jamoalarning gala-konserti tomoshabinlar e’tiboriga havola etildi. Tadbirni O‘zbekiston Respublikasida xizmat ko‘rsatgan artist Toshpo‘lat Matkarimov, “Sardoba” folklor ansamblining jozibali chiqishlari, “Nihol” mukofoti sovrindori Sherzod Davronovning tanlov ishtirokchilari jo‘rligida ijro etgan “O‘zbek degan nom” qo‘shig‘i yakunlab berdi.

 

Nizomiddin SADRIDDINOV.

 

Ta'sis etuvchi - NKMK mehnat jamoasi

Gazeta materiallarini to’la yoki qisman qaytadan bosish tahririyatning yozma ruxsati bilan amalga oshiriladi. Tahririyatga kelgan qo’l yozmalar taqriz qilinmaydi va muallifga qaytarilmaydi. Gazeta NKMK bo’linmalari orasida tarqatiladi. 

Gazeta Navoiy viloyat matbuot va axborot boshqarmasida 2006 yil 21 dekabrda 07-025 raqam bilan ro’yxatga olingan.
MUHARRIR

Sadriddinov Nizomiddin Xayriddinovich 

- matbuot markazi boshlig’i.
TAHRIRIYAT MANZILI : 210100, Navoiy shahri, Navoiy ko’chasi 27, NKMK boshqarmasi. 
TELEFONLAR: : 77-464 (muharrir), 77-363 (texn. muharrir), 77-366, 77-464 (matbuot markazi), 77-566 (faks).

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Matbuot XALQONA OHANGLARDA ORZU-UMIDLAR MUJASSAM