Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 12.02.2015 dan №3 nashr YANGI MARRALAR SARI

YANGI MARRALAR SARI

Murakkab iqlim sharoitlarida burg'ilash uskunalarini «gumburlatib» ishlatib, ishlab chiqarish topshiriqlarini o'z vaqtida bajarayotgan zabardast konchi yigitlarimizning xalqimiz oldida yuzlari yorug'. Negaki, ularning orzulari beg'ubor, niyatlari pok, Qalblarida yashashga, yaratishga ishtiyoq, ertangi kunga ishonch, iymon-e'tiqod mujassam. YAna ularda muqaddas ona-tuproqqa go'zal sadoqat, o'z farzandlariga, ota-onalariga, yoru birodarlariga nisbatan mehr-muhabbat bor. Bo'lmasa, kimsasiz qip-qizil cho'l bag'rida o'zinida unutib, kecha-yu kunduz jasorat ko'rsatib mehnat qilisharmidi?

Navoiy kon-metallurgiya kombinati 5-kon boshqarmasiga qarashli 2-geotexnologik kon jamoasi ana shunday ulug' niyatli insonlardan tashkil topgan. 1969 yilning bahorida «Janubiy Bukinay» nomi bilan uchastka sifatida ish boshlagan mazkur kon bugungi kunda nafaqat 5-kon boshqarmasi, balki Navoiy kon-metallurgiya kombinatida ham ilg'or bo'linmalardan biri sanaladi. Mehnat jamoasining 45 yillik jo'shqin faoliyati, o'z kasbiga fidoyi ishchi xodimlari haqida ko'p va xo'p gapirish mumkin.

Keksa konchilardan biri D.Beloklokov konning tashkil topishi haqida shunday yozgan: «1969 yilning oxirigacha «Janubiy Bukinay»ga texnologik asbob-uskunalarni olib kelish va tayyorlash, vaqtinchalik binolar qurish, texnologik quduqlarni burg'ilash bilan shug'ullanganmiz. Kuchli bo'ronli sovuq bo'lganligi uchun texnologik binoning poydevorlari qurilishini tavakkaliga qilganmiz, chunki quruvchilar ham, geologlar ham tuproq tarkibiga javob berisholmagan. Beton Navoiydan kelguncha yo'lda muzlab qolardi, beton qorishni to'xtatib turishning iloji yo'q edi. YAngi, 1970 yilni beton qoradigan mashinaning shovqinli gumbur-gumburlari bilan kutib olganmiz».

Konchilarning cho'l bag'rida yashirinib yotgan boyliklarni o'zlashtirish, xalq va davlat manfaatlari yo'lida xizmat qildirishni ko'zlab boshlagan mashaqqatli, shu bilan birgalikda sharafli mehnatlari haligacha davom etmoqda. To'g'ri, bu orada qancha suvlar oqib o'tdi. Kon tarixida qiyinchiliklar ham, yuksalishlar ham bo'ldi. Biroq, jamoaning o'ziga xos an'analari, asosiy ish tamoyillari saqlanib qoldi.

Geotexnologik kon mustaqillik yillarida o'zining yangicha rivojlanish yo'liga chiqdi. Jamoa safi mamlakatimiz oliy o'quv yurtlarini tugallagan yosh mutaxassislar va kasb-hunar kollejlarining bitiruvchilari bilan to'ldi. 2005 yilda kon tarkibida bugungi kunda asosiy geotexnologik quduqlarni burg'ilash va mahsulot qazib olish bo'yicha kon boshqarmada etakchilik qilayotgan yangi «SHimoliy Konimex» uchastkasi ish boshladi. Zamonaviy asbob-uskunalar bilan jihozlangan va ishchilar uchun barcha qulayliklarga ega zamonaviy maishiy kombinat foydalanishga topshirildi. Kondagi ishchilar oshxonasi qayta rekonstruksiya qilinib, to'la ta'mirlandi. Ayni paytda mazkur bo'linmada mehnat qilayotganlarning oltmish foizga yaqinini yuqori malakali ishchi-xodimlar tashkil qiladi. Jamoaga tajribali mutaxassis Kazbek Djalgasbekov boshchilik qilib kelmoqda.

«Bizning geotexnologik konda 12 ta uchastka bo'lib, ularni o'z ishini yaxshi biladigan, qiyinchiliklardan qo'rqmaydigan, har qanday sharoitda ham reja topshiriqlarini uddalashga harakat qiladigan yigitlarimiz boshqarishadi. Ayniqsa, eritmalarni qayta ishlash uchastkasi boshlig'i, yosh, izlanuvchan mutaxassis Alisher Bobomurodov, «Janubiy Bukinay» geotexnologik uchastkasi boshlig'i Qahramon SHaripov, «SHimoliy Konimex» geotexnologik uchastkasi boshlig'i Janibek Japkaraev, geotexnologik quduqlarni jihozlash va ta'mirlash uchastkasi boshlig'i Ikrom Parmonov, avtogaraj boshlig'i Ozod Saidov, energiya xizmati boshlig'i Vladimir Svistunov, geofizika uchastkasi boshlig'i Axtyam Mirzaevlarning kon rivojiga qo'shayotgan hissalari katta. Uchastkalar ishini bir maromda tashkil qilish va mutaxassislar bilan ish olib borish geotexnologik kon bosh muhandisi, yuqori malakali mutaxassis Otabek Ro'ziev zimmasida. U ishlab chiqarishda sodir bo'ladigan har qanday murakkab vaziyatda konchilar yonida turib, elkama-elka ish olib borishi, jamoa muammolariga sidqidildan yondashishi bilan yoshlarga o'rnak bo'lib kelmoqda. Mehnat jamoamiz yakunlangan 2014 yilda tayyor mahsulot ishlab chiqarish rejasini 100,1 foizga bajardi. 2015 yilda oldimizda turgan davlat topshiriqlarini albatta bajaramiz. «SHimoliy Konimex» konini rivojlantirish istiqbolli vazifalarimiz sirasiga kiradi», - deydi u biz bilan suhbatda.

Hamjihatlik bor joyda rivojlanish, yuksalish bo'y ko'rsatadi. Donishmandlardan biri aytganidek, buyuk ishlar, ahamiyatli qadamlar faqatgina birlikda qo'lga kiritiladi. YUrt ravnaqi yo'lida chin dildan mehnat qilayotgan konchilarning ishlari har doim baroridan kelishini tilab qolamiz.

 

Salima Xoldorova.

Учредитель - трудовой коллектив НГМК

Полная или частичная перепечатка материалов из газеты допустима только с письменного разрешения пресс-центра. Редакция знакомится с письмами читателей, не вступая в переписку. Газета распространяется по подразделениям НГМК.

Газета зарегистрирована в Агентстве по печати и информации Навоийского облхокимията 29 июня 2015 года. Регистрационный номер - 07-070, ISSN 2010-5266.

Редакция

Джураев Абдумажид Ирисович
Начальник пресс-центра НГМК - пресс-секретарь генерального директора НГМК..
АДРЕС РЕДАКЦИИ: 210100, г.Навои, улица Навои 27, управление НГМК.
ТЕЛЕФОНЫ: 77-464(редактор), 77-363(техн.редактор), 77-366, 77-464(пресс-центр), 77-566(факс).

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 12.02.2015 dan №3 nashr YANGI MARRALAR SARI