• Created: 30.12.2022
• Updated: 30.12.2022
• Read: 2658

Fidoyi va mehnatkash jamoaga yangi yil tabrigi

Aziz hamkasblar! Qadrli mehnat faxriylari!

Siz, azizlarni, ko‘pming kishilik ahil jamoamizni, kirib kelayotgan Yangi – 2023-yil bilan samimiy muborakbod etaman. 

Bayram arafasida Prezident Shavkat Mirziyoyevning Oliy Majlisga va O‘zbekiston xalqiga yo‘llagan Murojaatnomasi 2023-yilda mamlakatimiz ijtimoiy va iqtisodiy taraqqiyotining ustuvor yo‘nalishlarni belgilab bergan tarixiy voqea bo‘ldi. Davlatimiz rahbari tomonidan Yangi yilga “Insonga eʼtibor va sifatli taʼlim yili”, deb nom berilishi 2023-yilda islohotlar izchil davom ettirilishining yorqin ifodasi sifatida butun xalqimiz qatorida jamoamizga ham ko‘tarinki ruh bag‘ishlab, ertangi hayotga  ishonchini mustahkamladi.

Murojaatnomada davlatimiz rahbari tomonidan kon-metallurgiya sohasida amalga oshirilayotgan yirik loyihalar qatorida 2023-yilda “Pistali” konida oltin tarkibli rudani qayta ishlash majmuasi qurilishi yakunlanishi qayd etib o‘tildi. Barchangizga maʼlumki, ayni vaqtda “Pistali” koni negizida yiliga 4 million tonna oltin maʼdanini qayta ishlaydigan 6-gidrometallurgiya zavodi qurilishi jadal surʼatda olib borilmoqda.

Joriy yilda “Balpantov” va “Tomdibuloq” konlarining oltinli maʼdanlarini qayta ishlash uchun 2-gidrometallurgiya zavodiga yetkazib berish maqsadida,  35 kilometrdan iborat yangi temir yo‘l liniyasi ishga tushirildi. Hozirgi kunda “Turbay” koniga 53 kilometrlik temir yo‘l liniyasini qurish ishlari jadallik bilan olib borilmoqda.

O‘zbekiston konchilik sanoati tarixida ilk bor Zarmitan sanoat maydonida diametri 6,5 metr bo‘lgan, texnik jihatdan nihoyatda murakkab hisoblangan “Skip” va “Klet” harakatlanadigan shaxtaning chuqurligi 1000 metrga yetkazildi. Bu kabi yutuqlarni ko‘plab keltirishimiz mumkin.

2022-yilni ham yaxshi iqtisodiy ko‘rsatkich va natijalar bilan yakunlamoqdamiz. Zamonaviy korporativ boshqaruv shakliga o‘tgan korxonamiz jamoasining mashaqqatli mehnati evaziga 56,4 trillion so‘mlik mahsulot ishlab chiqarib, barcha rejalarni ortig‘i bilan bajarishni mo‘ljallab turibmiz. Bunda, oltin ishlab chiqarish o‘tgan yilga nisbatan 106,2 foizga oshadi. Investitsiya dasturi doirasida esa umumiy qiymati 742 mln dollar bo‘lgan 3 ta loyiha foydalanishga topshirildi va natijada 2095 ta yangi ish o‘rinlari yaratildi.

2022-yilda kombinatimiz tarixiga yana bir voqea zarhal harflar bilan yozildi. Prezidentimiz farmoni bilan bir guruh olim va mutaxassislarimiz tomonidan yaratilgan “Texnologik va ishlanishi murakkab bo‘lgan oltin tarkibli maʼdanlarni qayta ishlash va o‘zlashtirishning kompleks texnologiyalarini ishlab chiqish va joriy etish” bo‘yicha ilmiy-amaliy ishlanmamiz birinchi darajali Davlat mukofoti bilan taqdirlangani ilmiy izlanishlarimizning yuksak eʼtirof bo‘lish bilan bir qatorda zimmamizga katta masʼuliyat ham yuklaydi, desam ayni haqiqatdir.

Jamoamizning barcha aʼzolariga yil davomida qilgan fidokorona mehnati, qo‘lga kiritilgan yutuqlarga qo‘shgan munosib hissasi uchun o‘z tashakkurimni bildiraman.

Fursatdan foydalanib, “Navoiyuran” davlat korxonasi va “NKMK jamg‘armasi” davlat muassasasida mehnat qilayotgan qadrdon hamkasblarimizni ham Yangi yil bayrami bilan samimiy tabriklayman.

Bizni oldinda ulkan dovon, katta rejalar kutib turibdi. Ko‘zlagan marralarga erishish uchun  jamoamizning kuchi, salohiyati to‘la yetadi. Hammasi fidoiyligimiz, birdamligimizga bog‘liq.

Yangi yil ostonasida yaxshi niyat qilaylik! Yurtimizda tinchlik va osoyishtalik bardavom bo‘lsin, barcha orzu-niyatlarimiz amalga oshsin. Ilohim, Yaratgan har biringizni o‘z panohida asrab, ishlarimizga rivoj bersin, yuzimizni hamisha yorug‘ qilsin.

Yangi yil barchamizga muborak bo‘lsin!

Quvondiq SANAQULOV,

“Navoiy kon-metallurgiya kombinati” AJ

Boshqaruvi raisi - Bosh direktori.