• Created: 21.08.2021
• Updated: 23.08.2021
• Read: 2044

Conversation on a relevant topic

Davlatimiz rahbari Shavkat Mirziyoyevning “Yangi O‘zbekiston” gazetasi bosh muharriri savollariga javoblari asosida tayyorlangan “Yangi O‘zbekiston demokratik o‘zgarishlar va amaliy ishlar mamlakatiga aylanmoqda” nomli suhbati mazmun-mohiyatini Navoiy kon-metallurgiya kombinati ishchi-xodimlari eʼtiboriga yetkazish bo‘yicha davra suhbati o‘tkazildi.

 

Maʼlumki, mamlakatimiz tarixidagi so‘nggi besh yillikda misli ko‘rilmagan islohotlar amalga oshirildi. Xususan, Davlatimiz rahbari o‘z intervyusi orqali olib borilayotgan islohotlarda har bir tizim rahbarining vazifasi, pozitsiyasi qayerda ekanligini aniq ko‘rsatib berdi. Shuningdek, kelajak uchun olib borilayotgan siyosat va tashabbuslar zamirida xalq manfaati, farovonligi, ijtimoiy-siyosiy himoyasi, xotin-qizlar, yoshlarning jamiyatdagi o‘rnini mustahkamlash, ularning imkoniyatlarini kengaytirish kabi maqsadlar mujassamligi yana bir bor o‘z isbotini topdi. Muxtasar qilib aytganda, mazkur intervyuda Prezidentimizning yagona maqsadi Yangi O‘zbekistonni tinch va farovon yurt, imkoniyatlar mamlakatiga aylantirish ekanligi ochiq bayon etilgan.

Davra suhbatida Navoiy kon-metallurgiya kombinati va Navoiy davlat konchilik instituti vakillari ishtirok etdi. Tadbirda NKMK bosh direktori maslahatchisi Xolmamat Raupov, NKMK reja-moliya bo‘limi boshlig‘i Umidjon Kostayev, NKMK Yoshlar yetakchilari Kengashi raisi Sanjar Radjabov, Navoiy davlat konchilik instituti prorektori Jamoliddin Nazarov, iqtisod fanlari doktori Nasiba Ashurovalar bugungi kunda mamlakatimizda barcha sohalarda amalga oshirilayotgan islohotlar zamirida ijtimoiy sohani yuksaltirish, jamiyatning ijtimoiy ahvolini yanada yaxshilash orqali odamlarni rozi qilish siyosati olib borilayotganligini taʼkidlab o‘tdilar.

– Jamiyatimizning siyosiy-huquqiy, ijtimoiy-iqtisodiy qiyofasi shiddat bilan o‘zgarib, hayotimizda yangicha munosabatlar, yangi imkoniyat va qadriyatlar shakllanayotganini hammadan ham ko‘proq his etmoqdamiz. Bunda maʼnaviyat targ‘ibotchilari va yoshlar yetakchilari hamda professor-o‘qituvchilarimiz faol bo‘lishi, xalqimizga namuna bo‘lib, davra suhbatida bayon etilgan fikrlarni puxta anglashi va uni xalqimizga tushuntirishi kerak, – dedi NKMK bosh direktori maslahatchisi Xolmamat Raupov.

Tadbir davomida davlat rahbarining intervyusida keltirilgan barcha sohalardagi amalga oshirilgan islohotlar va kelajakdagi vazifalar qanchalik muhim ekanligi ishtirokchilarga atroflicha yetkazildi.

NKMK Matbuot markazi.