• Yaratildi: 03.11.2022
• Yangilandi: 04.11.2022
• O'qildi: 2246

Samarqandda O‘zbekiston Iqtisodiy Forumi o‘tkazilmoqda

2022-yil 3-4-noyabr kunlari Samarqand shahrida “Inson manfaatlarini iqtisodiy islohotlarning bosh mazmuniga aylantirish” mavzusida II O‘zbekiston iqtisodiy forumi o'tkazilmoqda. Bugun ushbu nufuzli Forum o‘z ishini boshladi.

Forumda O‘zbekiston hukumati, xalqaro biznes va moliyaviy hamjamiyatlar, xalqaro va mintaqaviy ko‘p tomonlama rivojlanish institutlari, siyosatshunoslar, yirik sanoat korxonalar, nodavlat tashkilotlar va xalqaro ommaviy axborot vositalarining vakillari qatnashmoqda. Tadbirda "Navoiy kon-metallurgiya kombinati" aksiyadorlik jamiyati vakillari ham ishtirok etishmoqda.

Ekspert taqdimotlari va ochiq muhokamalar mamlakat taraqqiyot strategiyasida belgilangan islohotlarni amalga oshirishga bag‘ishlanadi hamda quyidagi mavzularga qaratilgan:

• makroiqtisodiy blokda – barqaror iqtisodiy o‘sish uchun zarur tizimli islohotlar, yashil iqtisodiyotga o‘tishning moliyaviy afzalliklari va ahamiyati, fiskal va pul-kredit siyosatining uyg‘unligini ta’minlash;
• ijtimoiy blokda – aholini ijtimoiy himoya qilishda maqsadli va manzilli siyosat yuritish hamda kambag‘allikni qisqartirish jarayonining bardavomligini ta’minlash;
• xususiy sektor blokida – kichik va o‘rta tadbirkorlikni rivojlantirishning yangi kompleks dasturi loyihasini taqdimot qilish, davlat korxonalarini xususiylashtirish hamda bank sektorini isloh qilish;
• davlat-xususiy sheriklikni rivojlantirish blokida – ustuvor loyihalarni sohalar va hududlar kesimida taqdimot qilish, amalga oshirilayotgan loyihalar samaradorligini oshirish;
• bozorlarni erkinlashtirish blokida – sog‘lom raqobat muhitini yaratish, moliya bozorini rivojlantirish hamda yer munosabatlarini takomillashtirish va boshqalar.

Forumning birinchi kunida "NKMK" AJ rahbariyati va qator xorijiy kompaniya, banklar vakillari o‘rtasida uchrashuvlar bo‘lib o‘tdi.

Jumladan, "Hitachi Construction Machinery", "ThyssenKrupp", "Duratray International", "Liebherr" kabi xorijiy kompaniya, banklar vakillari bilan uchrashuvlarda o‘zaro manfaatli hamkorlik aloqalari muhokama etildi.

“NKMK” AJ Matbuot xizmati.