• Yaratildi: 09.12.2022
• Yangilandi: 09.12.2022
• O'qildi: 2961

Ixtirochilik va ratsionalizatorlik takliflari kombinat iqtisodiy rivojiga xizmat qilmoqda

Bugungi raqobat sharoitida “Navoiy kon-metallurgiya kombinati aksiyadorlik jamiyatida ixtirochilik va ratsionalizatorlik yo‘nalishlari bo‘yicha keng ko‘lamli ishlar olib borilmokda.

Korxonada ixtirochilik va ratsionalizator yoshlar va mutaxassislarni rag‘batlantirish maqsadida “Eng yaxshi ixtirochi”, “Eng yaxshi yosh ratsionalizator”, “Eng yaxshi innovatsion g‘oya va ratsionalizatorlik taklifi” ko‘rik-tanlovlari, shuningdek, hamma bo‘linmada yosh ratsionalizatorlar klublari, sex, zavod, kon va shaxtalarda to‘garaklar tashkil etilgan.

2011-2021-yillarda kombinat mutaxassislari 37 ta ixtiro uchun O‘zbekiston, Rossiya, Ukraina, Germaniya va Shveysariya davlatlari patentlarini qo‘lga kiritdi. Bugungi kunda uning 16 tasi ishlab chiqarish jarayonida qo‘llanilmoqda, 12 tasi bo‘yicha esa ish olib borilmoqda. 10 yilda yaratilgan ixtirolardan olingan iqtisodiy samaradorlik 1 trillion 244 milliard so‘mdan oshdi.

Bundan tashqari, ratsionalizatorlik yo‘nalishida olib borilayotgan ishlar ham eʼtirofga arzigulik. 2018-yilda 97 ta, 2019-yilda 113 ta, 2020-yilda 187 ta, 2021-yilda 206 ta ratsionalizatorlik taklifi ishlab chiqilib, ular to‘liq ishlab chiqarishga joriy etildi. Va bu takliflardan kombinat 2019-2021-yillarda 183,2 milliard so‘mlik iqtisodiy samaradorlikka erishdi.

Markaziy kon boshqarmasidan taqdim etilgan “Rudani yuvish maydonchasining yuqori qatlamlarida himoya qatlamini joylashtirish” mavzusidagi taklifdan erishilgan iqtisodiy samaradorlik 15,7 milliard so‘mni tashkil etdi. Shuningdek, Shimoliy kon boshqarmasidan taqdim etilgan “Konning oksidlangan rudalarini qayta ishlash hisobiga tayyor mahsulot ishlab chiqarish hajmini oshirish” mavzusidagi taklifdan olingan iqtisodiy samaradorlik 9,7 milliard so‘mni, 1-gidrometallurgiya zavodidan taqdim etilgan “Qoraqo‘ton” konining ishlanishi qiyin bo‘lgan maʼdanlarini qayta ishlash texnologik sxemasini takomillashtirish” mavzusidagi ratsionalizatorlik taklifidan olingan iqtisodiy samaradorlik 8,7 milliard so‘mni tashkil etdi.

– Kombinatga ishga o‘tgandan so‘ng orzularimni ro‘yobga chiqarish uchun imkoniyatlarga ega bo‘ldim, – deydi Shimoliy kon boshqarmasi Nazorat-o‘lchov asboblari va avtomatika markaziy laboratoriyasi muhandisi Azamat Isamov. – Ulkan korxonada mehnat qilayotganimdan g‘ururlanib, kombinat yutuqlariga nafaqat mehnatim, balki yosh ratsionalizator sifatida o‘z hissamni qo‘shishni asosiy vazifam, deb bilaman. Ratsionalizatorlik taklifim korxonaga qariyb 1,2 milliard so‘m iqtisodiy samara keltirishi kutilmoqda.

– Geologiya yo‘nalishida “Elektronlar taramining chiziqli tezlatkichning tormozlash nishoniga nisbatan holatini tekshirishning yangi usuli va belgili shisha namunasidan foydalangan holda elektronlar taramining fokuslanishini baholash” mavzusi hamda mexanika yo‘nalishida “Ch2-600 reduktorni rekonstruksiya qilish” mavzusida ratsionalizatorlik taklifi ustida ish olib bordim. Ushbu ratsionalizatorlik taklifning qulayligi shundaki, nasoslarning ishlash muddatini uzaytirish va xodimlar ishini soddalashtirishga qaratilgan, – deydi “Muruntov” koni Gamma-aktivlashtirilgan tahlil markaziy laboratoriyasi boshlig‘i Alisher Qo‘ldoshev.

Kombinatdagi o‘zgarishlar jarayonida ixtirochilik va ratsionalizatorlik takliflarini ilgari surayotgan ishchi-xodimlarning alohida o‘rni bor. Kombinat rahbariyatining yangiliklar yaratish yo‘lida ularni doimiy qo‘llab-quvvatlab kelayotgani esa kombinatning yil sayin rivojlanishiga o‘z hissasini qo‘shmoqda.

“NKMK” AJ Matbuot xizmati.