• Yaratildi: 16.02.2023
• Yangilandi: 17.02.2023
• O'qildi: 4311

NKMK: YUQORI QO‘SHILGAN QIYMATLI MAHSULOTLARI ISHLAB CHIQARISH MAQSADIDA Janubiy Koreya kompaniyalari bilan memorandumlar imzolandi

Keyingi yillarda Yangi O‘zbekistonda olib borilayotgan keng ko‘lamli islohotlar natijasida iqtisodiyotimiz tez surʼatlarda rivojlanmoqda. Davlatimiz rahbarining tashabbusi bilan mis mahsuloti va u bilan bog‘liq tarmoqlarda yuqori qo‘shilgan qiymatli mahsulotlar ishlab chiqarish, sohada faoliyat yurituvchi subyektlar o‘rtasida samarali kooperatsiya aloqalarini yo‘lga qo‘yish bo‘yicha keng ko‘lamli ishlar olib borilmoqda. Bu yo‘nalishda mis sanoati klasteri rivojlangan xorijiy kompaniyalarning tajribasini o‘rganish muhim hisoblanadi. 

Joriy yilning 9-15-fevral kunlari Navoiy kon-metallurgiya kombinati mutaxassislarining bir guruhi Janubiy Koreyaga tashrif buyurib, mamlakatdagi yetakchi sanoat va yuqori texnologiyalarga asoslangan ishlab chiqarish kompaniyalari faoliyati bilan yaqindan tanishdi.

Safar davomida kombinat mutaxassislari Janubiy Koreyaning misni chuqur qayta ishlash va yuqori qo‘shilgan qiymatli tovarlarni ishlab chiqarish hamda mashinasozlik va stanoksozlik kabi yo‘nalishlarda faoliyat yuritadigan “PNT INC”, “KOMA TECH”, “SMART MACHINE Tool”, “HANKOOK Machine Tools” kompaniyalarida bo‘lishdi. Taʼkidlash kerakki, Janubiy Koreya elektronika, robototexnika, avtomobilsozlik, kemasozlik, og‘ir mashinasozlik va sanoatning boshqa yuqori texnologiyalarga asoslangan tarmoqlari keng miqyosda rivojlangan davlat hisoblanadi.

Kombinat mutaxassislari Janubiy Koreyaning sanoatni rivojlantirish va zamonaviy ishlab chiqarish zanjirini to‘liq yo‘lga qo‘yish borasidagi tajribasini o‘rganish maqsadida yuqori qo‘shilgan qiymatli tovarlarni ishlab chiqarishda keng qo‘llaniladigan, qalinligi 6-8 mikronlik mis folgasini ishlab chiqarishga mo‘ljallangan texnologik uskunalarni ishlab chiqaradigan “PNT INC” kompaniyasining Gumi shahrida joylashgan zavodida bo‘ldilar. Kombinat mutaxassislari va mazkur kompaniya vakillari o‘rtasida hamkorlikni yo‘lga qo‘yish bo‘yicha muzokaralar olib borildi. Muzokaralar natijasida  tomonlar o‘rtasida “NKMK” AJ negizida mis folgasini ishlab chiqarishni tashkil etish bo‘yicha hamkorlik memorandumi imzolandi. Mis folgasi bugungi kunda juda talab yuqori bo‘lgan mahsulot hisoblandi. Bu mahsulot elektronika, avtomobilsozlik, stanoksozlik, asbobsozlik kabi sohalarda keng qo‘llaniladi. Bu esa kombinatda jahon bozoriga yuqori qo‘shilgan qiymatli mahsulot ishlab chiqarishni taʼminlaydi.

Shuningdek, kombinat mutaxassislari Janubiy Koreyaning mashinasozlik va stanoksozlik sohasida to‘plangan tajriba bilan tanishish uchun “KOMA TECH”, “SMART MACHINE Tool”, “HANKOOK Machine Tools” kompaniyalarning Kimxe shahrida joylashgan zavodlariga ham tashrif buyurdilar. Ushbu kompaniyalar vakillari bilan olib borilgan muzokaralar natijasida mazkur  kompaniyalar uchun kerakli detal va ehtiyot qismlarni “NKMK” AJ Navoiy mashinasozlik zavodida ishlab chiqarish hamda kombinatda yuqori texnologiyalarga asoslangan stanoklar ishlab chiqarishni yo‘lga qo‘yish bo‘yicha hamkorlik memorandum imzolandi. Demak, mamlakatimizda yangi avlod stanoklarini ishlab chiqarishda istiqbollar ochiladi.

Navoiy kon-metallurgiya kombinati va Janubiy Koreyaning yetakchi sanoat kompaniyalari o‘rtasida yuqorida taʼkidlangan yo‘nalishlarda o‘zaro manfaatli hamkorlikni yo‘lga qo‘yish bo‘yicha olib borilayotgan saʼy-harakatlar tufayli yaqin kelajakda Markaziy Osiyoda birinchi bo‘lib, xomashyoni qazib olishdan to yuqori qo‘shilgan qiymatli mahsulotlarni ishlab chiqarishgacha bo‘lgan zanjir tashkil etiladi. Bu esa yirik sanoat korxonalari va tadbirkorlik subyektlari o‘rtasidagi sanoat kooperatsiyasini yana-da rivojlantirishga xizmat qiladi.

“NKMK” AJ Matbuot xizmati.