• Yaratildi: 27.04.2023
• Yangilandi: 27.04.2023
• O'qildi: 2142

Xavfsiz muhitda ishlash – har bir insonning huquqidir

Xalqaro mehnat tashkilotining tashabbusi bilan 2003-yildan buyon 28-aprel – Butunjahon mehnatni muhofaza qilish kuni sifatida keng nishonlanmoqda. Joriy yilda kombinatda mazkur sanaga bag‘ishlangan turli tadbirlar “Xavfsiz va sog‘lom mehnat muhiti – mehnat sohasidagi asosiy tamoyil va huquqdir” shiori ostida o‘tkazilmoqda.

“Navoiy kon-metallurgiya kombinati” aksiyadorlik jamiyatida inson hayoti, sog‘ligi bilan bog‘liq bo‘lgan mehnat muhofazasi va xavfsizlik texnikasini taʼminlash muhim ahamiyat kasb etadi.

Butunjahon mehnatni muhofaza qilish kuni arafasida “1-GMZ” kon boshqarmasi hududida mehnat muhofazasi va xavfsizlik texnikasiga bag‘ishlangan ko‘rgazma tashkil etildi. Ushbu ko‘rgazmada zamonaviy shaxsiy himoya vositalari, turli xil maxsus kiyimlar, yong‘indan himoya qilish va yong‘inga qarshi vositalar hamda yong‘inga qarshi texnikalar namoyish etildi.

Tadbirda kombinat bo‘linmalarining mehnat muhofazasi va xavfsizlik texnikasi bo‘yicha mutaxassislar, yong‘in xavfsizligini taʼminlash bo‘yicha masʼul xodimlar, “Navoiyuran” DK vakillari, Navoiy davlat konchilik va texnologiyalar universiteti talabalari ishtirok etdilar.

Shuningdek, tadbirda “1-GMZ” kon boshqarmasi vakillari tomonidan kardio jonlantirish trenajeri yordamida qanday qilib jarohat olgan insonga birinchi tez yordam berish ko‘rsatildi. Shu bilan birga yong‘in xavfsizligini taʼminlash bo‘yicha masʼul xodimlar ishlab chiqarishda yong‘in xavfsizligi bo‘yicha maʼruza qildilar.

Bundan asosiy maqsad, kombinat ishchi-xodimlarining mehnat muhofazasi va xavfsizlik texnikasiga oid bilimlarini oshirib borish, ishlab chiqarishda yuzaga kelishi mumkin bo‘lgan baxtsiz hodisalar oldini olishga qaratilgan.

  “NKMK” AJ Matbuot xizmati.