• Yaratildi: 17.05.2023
• Yangilandi: 17.05.2023
• O'qildi: 2277

 Mahsulotlar eksporti amalga oshirilmoqda 

Bugungi kunda Navoiy kon-metallurgiya kombinati faoliyatining yo‘nalishlaridan biri konchilik va mashinasozlik sohasi mahsulotlarini eksport qilishdir.

Kombinatning eksportga mo‘ljallangan asosiy mahsulotlari Navoiy mashinasozlik zavodida ishlab chiqarilmoqda. Jumladan, 2021-yildan boshlab korxonada tayyorlangan, dastgohsozlikda keng qo‘llaniladigan stanina mahsuloti Belorus Respublikasining “Gomel dastgohlar zavodi” AJga eksport qilinmoqda. Eksport hajmi yildan yilga ortib bormoqda.

2022-yilda ilk bor NMZda tayyorlangan, metallurgiyada foydalaniladigan plastmassa buyumlari Rossiyaning “Pavlik” AJ konchilik kompaniyasiga eksport qilindi. Shuningdek, Tojikistonning “Talco” kompaniyasi uchun mashinasozlik uskunasini qayta ishlash xizmatlari ko‘rsatildi.

Shu bilan birga, eksport salohiyatini oshirish maqsadida Qirg‘izistonning qator konchilik kompaniyalari, shu jumladan, “Ala-Too” kompaniyasi Navoiy mashinasozlik zavodida ishlab chiqarilayotgan turli ehtiyot qismlar va uskunalarga katta qiziqish bildirmoqda. Hozirda mutaxassislar tomonidan kerakli asbob-uskunalarni tayyorlash va qo‘shni davlatga yetkazish imkoniyatlari o‘rganilmoqda.

Taʼkidlash kerakki, kombinat mahsulotlarini eksportga yo‘naltirish ishlarini muvofiqlashtirishda “NKMK” AJ Sotish bo‘limining xizmatlari muhim ahamiyat kasb etadi.

“NKMK” AJ Matbuot xizmati.