• Yaratildi: 07.06.2023
• Yangilandi: 07.06.2023
• O'qildi: 2688

Raqamli texnologiyalar ishlab chiqarishga joriy etilmoqda

Mamlakatimizda raqamli iqtisodiyotni rivojlantirish, barcha tarmoqlar va sohalarda zamonaviy axborot-kommunikatsiya texnologiyalarini keng joriy etish maqsadida “Raqamli O‘zbekiston – 2030” strategiyasi izchil amalga oshirilmoqda.

Mazkur strategiyani Navoiy kon-metallargiya kombinatida amalga oshirish bo‘yicha dastur qabul qilingan bo‘lib, korxonada ishlab chiqarish jarayonlariga raqamli texnologiyalarni joriy etish borasida qator loyihalar ro‘yobga chiqarilmoqda. Kombinat mutaxassislari tomonidan transport boshqaruvi, ishlab chiqarish, moliya, kadrlar, moddiy-texnika taʼminoti, korxonaning energiya resurslarini nazorat qilish, rejali taʼmirlashni boshqarish, buxgalteriya hisobi kabi yo‘nalishlardagi vazifalarni bajaradigan ko‘plab axborot tizimlari ishlab chiqilgan.

Jumladan, 2022-yilda “NKMK” AJ Axborot-kommunikatsiya texnologiyalar boshqarmasi “Uchquduq” Axborot-kommunikatsiya texnologiyalar markazi dasturchilari tomonidan 15 dan ortiq axborot tizimlari ishlab chiqilib, amaliyotga muvaffaqiyatli joriy etildi. Ana shunday yangiliklardan biri “Tibbiy ko‘rik” axborot tizimi bo‘lib, ishchi-xodimlarga qator yengilliklar yaratdi. Maʼlumki, korxonada ishlab chiqarish jarayonlari smenalarda tashkil etilgan, har bir smena boshlanishi va tugashida ishchi-xodimlar tibbiy ko‘rikdan o‘tkaziladi. Bu jarayonda ularning tibbiy ko‘rik xulosalari to‘g‘risidagi maʼlumotlarni rasmiylashtirish ko‘p vaqt va qo‘l mehnatini talab etiladi. Ushbu jarayonlarni avtomatlashtirish natijasida tibbiy ko‘rikni o‘tkazishga  sarflanadigan vaqt sezilarli darajada qisqartirilishiga erishildi.

Ishlab chiqarishga zamonaviy axborot-kommunikatsiya texnologiyalarini joriy etish, avtomatlashtirish jarayonlarining uzluksizligi va barqarorligini taʼminlash iqtisodiy foyda keltirmoqda. Eng muhim jihati shundaki, bunday salmoqli natijalarga mahalliy kadrlarning bilimi va mehnati bilan erishilmoqda.

“NKMK” AJ Matbuot xizmati.