• Yaratildi: 15.08.2023
• Yangilandi: 15.08.2023
• O'qildi: 2933

Ota-onalarga umid baxsh etgan mehr maskani

IJTIMOIY MASʼULIYAT

Navoiy kon-metallurgiya kombinati ijtimoiy masʼuliyatni zimmasiga olib, Qizilqum hududi infratuzilmasini rivojlantirishda faol qatnashib kelayapti.

So‘nggi yillarda Zarafshon shahrida kombinat mablag‘lari hisobidan ko‘plab bunyodkorlik ishlari amalga oshirilib, zamonaviy ijtimoiy obyektlar barpo etildi.  O‘zbekiston Respublikasi Prezidenti tashabbusi bilan kombinat tomonidan foydalanishga topshirilgan “Umid” reabilitatsiya markaziga ega ko‘p tarmoqli ixtisoslashtirilgan maktabgacha taʼlim tashkiloti 2022-yil 22-iyundan o‘z faoliyatini boshladi. Qisqa vaqt mobaynida mazkur ixtisoslashtirilgan muassasa imkoniyati cheklangan bolajonlar uchun mehr maskaniga aylanib, ko‘plab oilalarga, ota-onalarga quvonch, umid baxsh etdi.

Ushbu maktabgacha taʼlim tashkiloti bolalar uchun chinakam g‘amxo‘rlik namunasi bo‘ldi. Mazkur tashkilot ikki yoshdan yetti yoshgacha bo‘lgan, harakatida nuqsoni bor, imkoniyati cheklangan va turli tashxisdagi bolajonlarni olti guruhda belgilangan meʼyorlar asosida davolash, sog‘lomlashtirish va taʼlim-tarbiya berishga mo‘ljallangan. Ayni paytda unda 78 nafar bolalar reabilitatsiya qilinmoqda. Ular uchun mashg‘ulotlar va muolajalar olib borish xonalari, yotoqxona, oshxona, maxsus sport maydonchalari, amfiteatr, zarur jihoz va mebellar, turli o‘yinchoqlar mavjud.

O‘tgan qisqa vaqt davomida bu maskanda 22 nafar bolajonlar sog‘lom hayotga qaytgani bu muassasaning katta yutug‘i bo‘ldi.

- Taʼlim maskanimizga Zarafshon shahri, Uchquduq va Tomdi tumanlaridan bolalar qabul qilingan, - deydi tashkilot rahbari Dilafro‘z Fayziyeva. - Oltita guruhda 10,5 soatlik amaliy mashg‘ulotlar, muolajalar, jismoniy davolash jarayoniga defektolog, surdopedagog, psixolog, fizioterapevt, pediatr, otolaringolog, nevropatologlar jalb qilingan.  Dastlab tayanch harakat tizimida nuqsoni bo‘lgan to‘rt nafar bolalarimiz shifo topishdi. Endilikda ular tengdoshlari qatorida hech kimning ko‘magisiz yurib ketdi. Bundan tashqari, sakkiz nafar tarbiyalanuvchilarimiz to‘liq sog‘lomlashtirilib, ular bog‘chalarga ko‘chirildi. Xuddi shunday sog‘lomlashtirilgan olti nafar bolajonlar ham ota-onasi bag‘riga qaytarildi. Ular yangi o‘quv yilidan 1-sinfga o‘qishga boradi. Shuningdek, ikkitadan ortiq kasalliklari mavjud to‘rt nafar bolajonlar ham reabilitatsiya qilindi. Natijada 22 nafar bolajonlar o‘z tengdoshlari safiga qaytishdi. Ayni paytda ham yana ko‘plab xonadonlarga quvonch ulashish harakatidamiz.

Shuni taʼkidlash kerakki, bu boradagi ishlar tizimli ravishda davom ettiriladi. Bu mamlakatimizda inson qadriga alohida eʼtibor qaratilayotganligi va hech kim davlatimiz g‘amxo‘rligidan chetda emasligidan dalolatdir.

“NKMK” AJ Matbuot xizmati.