• Yaratildi: 28.09.2023
• Yangilandi: 28.09.2023
• O'qildi: 206

Milliy qadriyatlarimiz – millat ko‘zgusidir

Yurtimiz bo‘ylab “Xon atlas” festivali davom etmoqda. Bugun Navoiy shahridagi “NKMK tarixi” muzeyida “NKMK” AJ va “NKMK jamg‘armasi” DM ayollar Kengashlari tomonidan “Milliy qadriyatlarimiz – millat ko‘zgusidir” mavzusida maʼnaviy-maʼrifiy tadbir tashkil etildi. Unda ikkita korxona xotin-qizlari vakillari festival shartlari bo‘yicha chiqishlari bilan ishtirok etishdi.

Maʼlumki, atlas, adras matolari o‘zining bejirimligi bilan o‘z qadrini yo‘qotmay, xotin-qizlarimizga yarashib, joziba bag‘ishlab kelayapti. Ushbu matoni keng targ‘ib etish maqsadida tashkil etilgan festival ishtirokchilarga cheksiz quvonch baxsh etmoqda. Mazkur tadbirda bu yana bir bor tasdig‘ini topdi.

Maʼnaviy-maʼrifiy tadbirda so‘z olganlar milliy matomizning betakrorligi, kelinlik seplarida albatta bo‘lishi kerakligi, chetdan kirib kelayotgan har xil moddalar o‘rniga, xotin-qizlarimiz bu matodan foydalanish zarurligi haqida o‘z mulohazalarini bildirdi.

Tashkil etilgan matolar ko‘rgazmasi, “Farhod” madaniyat saroyi tomonidan tayyorlangan musiqiy dasturi davraga yana-da fayz bag‘ishladi.

“NKMK” AJ Matbuot xizmati.