• Yaratildi: 02.02.2022
• Yangilandi: 02.02.2022
• O'qildi: 1617

Kombinat mehnat jamoalarida

“Navoiy kon-metallurgiya kombinati” aksiyadorlik jamiyati bugun mamlakatimizning turli hududlarida o‘z bo‘linmalariga ega. Ulardan biri – Markaziy kon boshqarmasi Markaziy taʼmirlash-mexanika sexining Xorazm viloyati Tuproqqalʼa tumanida joylashgan “Sarimoy maydoni” payvandlash-mexanika uchastkasidir.

Mazkur uchastka o‘tgan yilning may oyidan o‘z faoliyatini boshladi. Dastlab joy tanlandi, taʼmirlandi, metall kesish, tokarlik, frezerlik, parmalash va boshqa dastgohlar olib kelindi, 20 ta yangi ish o‘rniga sarimoylik yoshlar tanlab olindi va ular Markaziy kon boshqarmasining Markaziy taʼmirlash-mexanika sexi bazasida o‘qitildi.

Bugungi kunda payvandlash-mexanika uchastkasida 40 dan ortiq turdagi mahsulotlarni ishlab chiqarish o‘zlashtirilib, kombinat bo‘linmalarga yetkazib berilmoqda. Uchastka ishchilari nasos ehtiyot qismlari va uzellari, vallar, yarimmuftalar, har xil turdagi korpuslar, boltlar, gayka va boshqa mahsulotlarni yasash, elektrgazpayvandlash ishlari bo‘yicha har xil hajmdagi konteynerlar, drenaj romlar va payvandlash usuli bilan detallarni taʼmirlash ishlarini bajarishadi. Joriy yilda uchastkani yanada kengaytirish choralari ko‘rilayapti.

Ha bugun, jo‘shqin Amudaryo sohilida joylashgan bu kichik korxonada ish qizg‘in. Ahil jamoa zimmasiga olgan vazifalarni sidqidildan bajarish yo‘lida fidokorona mehnat qilmoqda. Ayniqsa, doimiy ish o‘rniga ega bo‘lgan sarimoylik yoshlarning quvonchi cheksiz.

“NKMK” AJ matbuot xizmati.